ثلاثي جميل

تحديث:
يقال بأن مشكلة النت الي تواجه البلاد .. ستحل في الربع الثاني من العام القادم
الله يعينكم


ثلاث أخبار اعجبتني وايد بالأيام الي طافت

أول خبر يقول

تم ايقاف ثلاث برامج تعرض على تلفزيون الكويت

الي ضحكني انه محد يطالع تلفزيون الكويت من فتره طويله .. اللهم بس حق هل ثلاث برامج

مشكلتي اني متابع لتلفزيون الكويت إجباري
اهني انا مركب ستلايت فيه بس 14 قناة عربية .. اغلبها تكون حكوميه
فمن الصبح إلا الليل مجابل قناة الكويت العظيمه

لا برامج نفس الناس ولا إعداد مثل العالم .. لا والوقت مختلف عندنا بعد

يعني الساعه ثنتين بليل عندنا توهم امبلشين يومهم .. اول شي الرسوم المتحركه .. سيدة ملعقة (وايد يديد هذا) .. بعدين شووت .. بعدين دمتم سالمين (نصيحة حلقة اليوم كانت احترام آراء الآخرين وأدب النقاش)

بعد هذا كله يطلعلنا البرنامج الخالد العظيم .. ماما انيسه .. طبعا البرنامج عليه تغييرات وايد .. اهمها .. قبل بس نسمع صوت الأبلات .. الحين لأ .. نشوفهم صوت وصوره .. حركات أبلاتنا اليدد

بعدين يطلع أعظم برامجنا .. تلفزيون الأطفال .. رايحين المدينة الترفيهيه يوم اليمعه الساعه عشر الصبح ؟!!!!
منو رايح اهناك يعني ؟

ورا هذا كله .. يحطولك جم برنامج ديني باللهجه المصريه مادري ليش .. جنه ماكو شيوخ بالكويت

بعد ذلك .. خطبة اليمعه الي طبعا عندنا تكون الساعه 5 الصبح
مادري ليش ماكو بكل المسيد كويتي واحد
ساعات ينقلون من مسايد اعرفها ودايم اروحلها .. اشوفها بالتلفزيون .. ماكو كويتيين !!!

الساعه 5 الفير وبروح انام .. احسن من مجابل تلفزيونا الغبي

المشكله طول عمري اقول شنو الفايده من القناة الخامسة الي كانت تبث لشمال أمريكا .. الحين يوم عرفت فايدتها .. شالووووها !!

*
*

الخبر الثاني يقول
احتفال التحالف الوطني بنوريه الصبيح

انا بفهم اهما شكووو بالموضوع ؟
يعني الوزيره اهي بقدرتها ردت على الاستجواب السخيف المقدم لها
اهما شكووووو ؟
يدورون انجازات؟
الله يعينا

*
*

الخبر الثالث يقول
كيبل ضارب صوب مصر .. الكويت كلها مو قادره تشبك

انا اشوف ليش وضع المسنجر عندي غير طبيعي .. ماكو احد
وكل ماكلمت واحد يسب ويلعن بشركة الانترنت الي عنده
اثاري السالفه جذي


انا طبعا ابي استغل الفرصه .. وودي اتشمت

قلت اراويكم صور الشبكات الي عندنا .. وحده اسرع من الثانيه



وهم بالمره .. احطلي جم فيديو من يوتوب
لأنه نصكم راح ينقهر .. الفيديوات ما تشتغل عنده :)

شوفو القيادة على أصولها

شوفو لغة البحريني الثاني .. قويه .. غريب الصراحة

*
*

آخيرا .. التصويت الأخير كان واضح
السالفه مايبيلها حجي .. الجاي يصبون فوقه حليب .. لذلك جاي حليب


جان زين تصوتون على الاستفتاءات اليديده .. وتره اليوم مطبق عدم الاختلاط .. فالرجاء التقيد بالقانون .. وشكرا :)

وتره الي ما قرا البوست كامل مو ذنبي اذا صدق التحديث :P

الوحي على التربية

تحديث

يا شباب انا مالي أي علاقة بالفيديو .. مو شقتي .. مالي شغل أنا

أنا برييييييييييء

:)

*
*

بعد السفرة والوصول إلى ديار الغربة .. إنقطع وحي أفكاري فجأة
لا أعلم لمذا حصل ذلك .. أو ما هي العوامل التي أدت لإنقطاع ذلك الوحي

لكن باختصار أعتذر عن التقصير في الفتره السابقة .. والقادمة
وشكراّ لكل من سأل عني

أولا: أتمنى الدعاء لاخوانكم في غزة ... ... لا طعام ولا ماء ولا كهرباء ولا دواء !!
لا يوجد إلا الله القوي الجبار ...
اللهم انصرهم على الظالمين واعنهم يا رب العالمين


ثانيا: أبارك لنورية حصولها على ثقة المجلس

بالنسبة لي .. وزارة التربية من أفشل وزارات الدولة للأسف
نظام تعليم ثانوي فاشل .. وزارة للتعليم الواطي .. مناهج متخلفة .. اعتدائات في المدارس

لتعلم نوريه .. أنها كانت تستحق الثقه .. لتفاهت الإستجواب وسخافة طرحه
ليس لقوة وزارتها .. بل هي وزارة فاشله لأبعد الحدود


عندي قصتين تذكرتهم عن وزارة التربية .. كفيلين باسقاط أقوى وزير من رأس هل وزارة
بس محد مقدر الي عندي .. لو مستشيرني يا الشريع .. جان كنت راهي بالاستجواب


القصة الأولى .. متعلقة بالفصل بين الجنسين

وانا قاعد بالزواره .. إييلي واحد من اليهال .. مادري جم عمره .. لكن توه يعرف يتكلم .. وبثانية روضة

الحبيب: يوسف !! ـ
انا : هلا هلا حمادة .. اشلوووونك؟
الحبيب: انا زين .. يوسف .. تدري عندي رفيجتين بالروضة .. وحدة اسمها سارة ووحده فرح !! ـ
انا: ما شاء الله .. وبعد منو غيرهم اتعرف
الحبيب: لأ هذيل أحبهم .. مضبطهم انا .. حلوات .. رفيجاتي
انا: @@عيب شنو مضبطهم .. اشهل حجي .. تبي أقول حق أمك؟
الحبيب: عادي قولها .. أصلا تدري اني احبهم !! ـ
انا: انزين بقول حق أبوك
الحبيب: لأ تكفه .. تكفه .. لاتصير جذي .. مره ثانيه ما أقولك شي

طبعا الحبيب عمره أقل من 5 سنين وطايحله حب .. ولاحظوا الاسلوب القوييييي ..يقولي تكفة .. انا ماكنت ادري انه يعرف يتكلم .. شوفو سوالف يهال هل جم يوم

الإقتراح يقول .. المفروض يسوون فصل بالروضة


القصة الثانية .. معاشات هلي يدرسون بره مساكين

ماراح أتكلم وايد .. هذا الفيديو يعبر عن الوضع المزري .. الله يكون بعونكم


طبعا هذيل قصتين تذكرتهم على السريع .. ولا أحط الوزارة براسي .. تره تروحون فيها :)

*
*

أخيراّ .. نتايج التصويت الأخير كانت واضحة جداّ .. ومايبيلها نقاش

بس اعجبوني الصريحين وقالو انجلش سكول

ولاتنسون التصويت اليديد :)

شجب واستنكار

من هذا المنبر ومن عتبات هذي المدونة .. اشجب واستنكر بشدة خسارة منتخبنا الوطني المعظم من منتخب ساحل العاج

ليش بس 2-0 ؟


وأيضا اشجب وبشدة اكبر من الشدة الاولى .. زيارة مستر بوش لبلدنا الحبيب
ليش بس يوم واحد ؟

واعلن هنا عن قراري العظيم .. بمغادرة الديره حتى يتم تنفيذ مطالبي
ومطالبي يتوسع المجال لذكرها .. فاتركها لبوست وحيد في القريب العاجل

*
*

مباراة ساحل العاج

وقتها فاشل .. تنظيمها فاشل .. حضور فاشل .. رعاية فاشلة .. ملعب فاشل .. ماكو شي مو فاشل

هذي هي الكلمات التي تصف مباراة الأمس

يعني الجو بارد .. منو راح يحضر غير الشباب؟ .. وحاطينها وقت امتحانات .. سواء الثانويه ولا المعاهد والجامعات

تنظيم ؟؟
شنو يعني تنظيم؟

رعاية .. شوفو الصوره وتعرفون شنو رعاية
ماكو بشت مو موجود بالملعب .. احس لاعبين ساحل العاج يقولون .. اشيبون هذول بالضبط ؟




ملعب ؟
شوفو الشاشة بس .. من الستينات .. نفسها
ليش ؟

لاحظو ماكو جمهور موليه .. لا والتذاكر على سبعه واربعه !!

هذا هدف دروجبا .. تصويري

*
*

بس تدرون شنو الي يبط جبدي بقرار السفر الي اتخذته؟

بسافر بإتجاه القطب الشمالي المتجمد

ومناك للأسف ماكو



شاليه

بين نارين

كباب بنيد القار

شارع المطاعم

فطاير وبطاط وعوار قلب

راح أشتاقلج يا الكويت

متى يعتاد الإنسان على الغربة؟
مشكلتنا أننا في سفرنا نختلف عن بقية العالم
فنحن نودع جنة .. رغم كل ما بها من عيوب .. تبقى جنة

الهدوء الذي يسبق العاصفة

تحديث
وفقت الوزيرة في الاستجواب .. كان الاستجواب بشكل عام راقي جدا
اتوقع أن المعارضين لن يتمكنو من الحصول على العدد المناسب لطرح الثقة
يا خبر اليوم بفلوس :)

اكتب هذي الكلمات قبل توجهي إلى الفراش .. وذلك استعداداّ لحضور جلسة استجواب نورية الصبيح يوم غد

هو من اصعب الاستجوابات .. فليس هناك سيناريو واضح لما سيحصل بعد ساعات .. كثير من الكتل والنواب لا تملك مواقف ثابته .. كل السيناريوات معروضه .. حتى حل مجلس الأمه يتم تداوله بقوة

لذلك قررت إني أغير المود اليوم
واجعله هو البوست الذي يسبق العاصفه المتوقعه

أول شي تعليق بسيط على نتايج الإستفتاء الي تم التصويت عليه في المدونه

بالنسبة لي اعتقد بان الاجابة الصحيحه هي اجلكم الله .. انعالي انباق .. انولدت وانا اقولها جذي
والدليل على ذلك .. اذا نبي نقولها بالفصحي .. سنقول .. سرق نعالي .. فيكون النعال مذكر

احتمال اكون غلطان

لكني سأحاول أن أقنع نفسي بإجابة الغالبية هنا
وهي انعالي انباقت

لدي نظرية تقول بأننا ككويتيين يجب أن نتفق على مصطلحات معينه .. حتى تكون لهجتنا خاليه من الشوائب :)

*
*

هذي صورة لأجزخانه في مصر .. تنفع للجميع
سواء كنت انسان او غير ذلك


*
*

وأخيرا

أتحدى الجميع
تحدي تحدي تحدي تحدي تحدي

وله جائزه قيمه .. الي يقدر يشوف الفيديو هذا كامل بدون ما يضحك




تحياتي .. ضحكوا قبل اخبار باجر :)

تقليد واستفهامات

قال رسول الله صلى الله عليه وعلى آله وسلم: (لتتبعن سنن من كان قبلكم،حذوالقذة بالقذة حتى لو دخلوا جحر ضب لدخلتموه،،قالوا يارسول الله اليهودوالنصارى؟قال :"فمن؟!)

كأنه يرانى في هذه الأيام
أشجار الكرسمس تنتشر في كل مكان
والاحتفالات بمولد ابن الرب -كما يدعي المسيحيون- منتشره بين المسلمين بشكل واضح


رأينا ما قاله العمانويل غريب في مقابلة له في الوطن .. والتي كانت للأسف تحتفل بشكل غريب باعياد الكرسمس
قال باختصار .. اذا رجع المسيح نحن في الجنة وانتم في النار
وقال نحن لا نتبادل الزواج مع المسلمين

هذا الوضوح في الطرح .. للأسف مفقود لدينا .. فنحن نحاول أن نحوّر في ديننا حتى نقترب منهم

*
*
*

تتكرر الإستفهامات حول جابر الخالد وزير الداخلية الحالي

كان رئيس أركان .. فلم تتجاوز مدته السنه .. وفي العاده تصل المده إلا العشر سنوات
أصبح سفيرا للكويت في المملكة .. ولم تتجاوز فترته السنتين .. وعادة تكون الخمس سنوات واكثر

واليوم الإستفهام الكبير .. التجنيس ؟!!؟
بعض الأسماء المشبوهه وأشهرها الصبيح .. شي يدعو للإستغراب
لماذا لم يقم بعرض الأسماء للجنة محايدة وثم تعرض على مجلس الأمة قبل إقرارها

*
*
*

لم يكن رأس السنة كباقي الأيام بالنسبة لي

فقد حاولت أني أحتفل بهذه المناسبة الحزينة - لأننا نودع سنة وندخل على سنة ونحن مكانك قف كدولة وكشعب - بأفضل أماكن السياحة لدينا في الكويت

أولا فطاير شويخ



بعد ذلك سوق المباركية






يالها من ليلة :)

*
*
*

أخيراّ
هوا مين شريف ده ؟؟؟

نتايج التصويت تثير كثير من الأسئلة .. تعليقي على النتايج .. مؤجل :)

ليش نبيها أرخص؟

قبل فتره قصيرة .. ظهرت لنا على الساحة الإنترنتية حملة جميلة
الحملة تلك كانت جميلة بفكرتها
أما تطبيقها لم يكن بذلك الإتقان والذي جعلها لا تلاقي إستحساناّ وإقبالاّ بين الناس بالصورة المطلوبة

هي حملة نبيها أرخص؟
التي انتهت قبل فتره ولم تنجز ذلك الشيء الكبير



لكن لماذا حازت الفكرة إستحساني مما جعلني أدعم هذه الحملة؟

باختصار لأنها وضعت يدها على الجرح .. فهي خاطبت ودعت لمقاطة شركتي الاتصالات المتواجدتين في الكويت !!

يقول البعض بأننا نظلمهم بتلك المقاطعة .. فهي شركات تقدم ما لديها من خدمات وتسعى للربح

لكن السؤال هنا؟ .. لماذا يأتي هذا الربح بهذه الطريقة الجشعه والتي تظر المستهلك بالدرجة الأولى

لن أطيل اليوم في سرد القصص والروايات
سوف أقارن بين هاتين الشركتين .. وبعض الشركات الأجنبية التي كان لي تعامل معها
وبعد ذلك أترك لكم الحكم على شركتينا هنا في الكويت !!


الأولى هي شركات أمريكا الشمالية .. وبالخصوص كندا :ـ

في كندا أقوم بدفع اشتراك شهري يعادل 14 دينار تقريباّ

هذا الإشتراك يقسم ساعات التحدث إلى قسمين .. ساعات العمل و الساعات العادية
الساعات العادية تعتبر من الساعه السادسة مساءّ إلى السادسة صباحاّ وتكون تلك الساعات بالمجان .. بمعنى الاستخدام المفتوح
كذلك في العطل والإجازات ونهايات الأسبوع .. كل ذلك يكون بالمجان .. ويكون الإستخدام بشكل مفتوح

أما في ساعات العمل فتمنح 200 دقيقة مجاناّ للتحدث

الاشتراك يضم كثير من الخدمات من بينها خدمة
Voice mail
المكلفة جداّ في الكويت

مع العلم .. طريقة هذا الاشتراك هي الأكثر انتشاراّ في امريكا الشمالية .. ولا تبتعد الأسعار عن السعر الذي كتبته

سيقول البعض .. لقد إبتعدت كثيرا .. وذهبت بعيدا حتى وصلت إلى القطب الشمالي من الكرة الأرضية


هنا يأتي الموضوع الثاني :ـ

في السنة الماضية رزقني الله حجة لبيته الكريم
استغرقت تلك الحجة فترة 5 أيام تقريبا .. كنت خلال هذه المدة أستخدم رقم تلفوني الكويتي
صرفت في هذه الفتره 5 دنانير تقريبا
مع العلم بأنني لست كثير الإتصالات .. بل انا كثير السفر .. مما جعلني معتاداّ على الإستخدام الخفيف لنقالي أثناء السفر

في هذه السنة .. أيضاّ ذهبت للحج ولله الحمد
ولكن في هذه المرة استخدمت رقم من شركة سعودية
وكانت أيضا فتره خمسة أيام تقريباّ
صرفت فيها وبدون أي مبالغة مبلغ 7 ريالات فقط لا غير
وفي هذه المره كنت مسرفاّ في إتصالاتي .. وللأمانه تجاوزت إتصالاتي ماقمت به في العام الماضي


كل من استخدم أرقام من شركات سعودية سيعلم الفارق الكبير الذي اتحدث عنه
فالمئة رياال هناك .. تدووم وتدووم وتدووم
أما في الكويت
فالسبع دنانير لا تفيد لاسبوع واحد فقط


انا من مستخدمي خدمة الدفع المسبق .. وبالأخص اكسبرس
في غضون 3 سنوات تجاوز صرفي ال500 دينار
مع العلم بأني اتواجد في الكويت بمعدل 4 اشهر بالسنة فقط

أنا أحتفظ بكل كرت أقوم باستخدامه .. لذلك أعلم كم صرفت بالضبط
وهذه الصورة تبين ما أعني



صراحة مادري شقول .. بس السالفة واضحة
بوق أشكره
يعني لا خدمات نفس الناس ولا معاملة سنعه ولا شي مضبوط .. وآخر شي أسعار نار ؟؟

انا لو تطلع حملة اتقولي قاطع النقال موليه .. مستعد اوقف معاها .. لأنه السالفة فيها بوق عيني عينك

وما أنسى إني أشكر أصحاب فكرة نبيها أرخص

*
*

هذي الصورة تنفع تكون محور من محاور استجواب نورية الصبيح
ولا تقول نورية الصورة مو بالكويت
ترى هم تدخل هل امور من اختصاصاتج .. ولا اشرايك يا الشريع؟

جان زين لو تسوون الإستفتاء الي حاطه لأنه السالفة بغت تنتقل من الدوانية لي المخافر من شدت النقاش والاختلاف :)

صور تتحدث

عيدكم مبارك جميعاّ ولو إنها متأخرة


بعد انقطاع عن النت لفتره الحج فقط

رجعت وبطلت جهازي .. اشوف ولا طايفني وايد



162 بوست يديد

ومشكلتي ابي أقراهم كلهم .. قلت أحط بوست على السريع .. ثم أبدأ في الجولة البلوجرية :)

*
*



هذي اللوحة عجيبة .. وما اعتقد تتكرر بالعالم كله
لايشوفونها الأجانب .. من قال مو عنصرية هههه
باختصار .. الكفار يمين :)






وانا هذا العلم وين ما اروح لاحقني .. حتى بالعزيزية بمكة






ما حصلت عيادي .. وهذي عيديتنا من جمعية بيان .. حركات الصراحة .. وابداع في اختيار الاسم






يقولون اليوع كافر .. خصوصا في زحمة الحج .. وهذا الفيديو دليل

*
*

الحج هل سنه غير .. وايد سهلات
خصوصا مع اكتمال بعض المشاريع المهمه مثل مشروع الجمرات والمسعى اليديد

أخيراّ قاعد اشوف تطور جيد من قبل المسؤولين عن الحج .. بس نتمنى يبطلون عقولهم اشويه لمشاريع كبيره خصوصا من جانب المواصلات

هذي صورة لمشروع الجمرات اليديد وهم فيديو عن السهوله الكبيره في الرجم

ذكريات السبعينات والثمانينات .. وتلفزيون الوطن

تحديث :ـ

أنا في إجازة بلوجرية قصيرة .. أستودعكم الله

مجاراةّ للبوست العجيب في مدونة سدرة العشاق
وصلني اليوم ايميل يدور عن نفس الموضوع
واهو الذكريات وحبيت أشاركم فيه :)
بس هذا راح يكون لمواليد السبعينات والثمانينات .. الستينات شياب مايذكرون :)

تذكرون نقازية الارنب الجائع متروسه يهال .. وجم واحد يعني مجرمين ايام قبل .. حاجزينها كلها

تذكرون لما نشتري جواري بفلوس العيد ونفتر عند المحل مليون فره قبل لانركبهم السياره

تذكرون لما كنا انام مبجر حق العيد ونفرش الدشداشه على الارض ويمها المكسر والنعال ..يعني متزهبين

تذكرون سالفه اللي يحارب يحارب الله واللي يصاحب يصاحب الشيطان..يعني بالحالتين مافي مجال تصاحب

تذكرون لما كنا نسهر لي الساعه 1 بالليل يعني قمة السهر .. لين يقلب التلفزيون القناة الرابعه...وتقول حق ولد عمك لي الساعه جم تسهر؟

تذكرون لما كنا نلعب لعبة الطبيب تحت الدري واخر شي طايحين علينا وطااااااقينا طــــــــــــــــــــــق

تذكرين لما كنتي تمشطين شعر باربي 24 ساعه لين ينشلع راسها واخوج يلعب فيه كره

تذكرين صورتج وانتي ياهل مع الكشه او العناقيص والحين خايفه تورين ريلج صورج لا يعايرج فيها

تذكرون قبل لي رقمت وحده اتم طول اليوم يم تيلفون البيت وكل مارن اتنحنح...واخر شي تطلع خالتك

تذكرون لما نتشيطن واحنا ورى بالسياره والوالد يصفط يمين وينام فينا بالعقال والوالده تقولنا قلعتكم

تذكرين لما تدشين غرفة امج وتلطخين ويهج بالحمره جنج ماكله ياهل وتطيح عليج امج وتكفخج

تذكرين لما الوالده تحطلج حنه ليلة العيد وتشق قطعه من دراعه ماتبيها وتلف ايدج وتنامين فيها تقولين ملاكم

تذكرون كتكات مال اول اللي نيمع القصدير ماله نسوى كره والشفاف نرسم فيه خرايط الاجتماعيات

تذكرون لما كنا نحط قواطي سانكست في مدقر الجاري من ورى عشان يطلع صوت وااااااااو وااااااو واااااو

- تذكرون صمونة الارنب الجائع قبل سوبر بني شكبرها تقول دوار الجوازات.....بس كانت حلوه والله

تذكرون لما نترس البانيو يعني حمام سباحه واخر شي العوامه معلقة والتانكي فاضي والوالد يزفك

تذكرون لما كان احد يروح لندن قبل كنا نوصيه على كاكاو بو لحم يعني كاكاو فليك حاليا

تذكرون لعبه ام وابو (بروي) ونسوى من المساند بيت والمنسد الكبير نركب فوقه يعني سياره

تذكرين لما كنتي تنامين والعلج بحلجج واخر شي لازق بشعرج تعالي فججي ثلج وحاله

تذكرون الحركه الميلقه اللي يسوونها قبل اللي يحط ايده في اباطه ويحرك ايده عشان يطلع صوت..ماكو شغل

تذكرون هم الحركه الثانيه اللي لي بغيت تخرع اختك فيها تقلب رموش عيونك وتقول لها وااااااااو واخر شي الوالد طايح عليك وصاكك يمع من ورى

تذكرون لما كانوا البنات يلعبون حيله وكنا نمر عليهم ونشوت الصخره يعني ماندري...ملالالالالالالالاقه

تذكرون بطل الكراش شلون كان عنيف وكنا نكسر فيه يوز ولي صنيت في واحد دخلته العنايه المركزه

تذكرون لما نسمع راعي البرد بالفريج يقول بررررد ونطل عليه ونقوله برد برد اوقف ونروح نركب على التواير ونقي البرد اللي نبيه

تذكرون الحوض اللي قبل نسبح فيه مرسوم عليه حيوانات وكل ماطبينا فيه نلاقي نحله تسبح فيه

تذكرون لما كنا نلعب كره بالفريج وحد الاثاره والحماس واخر شي الكره رايحه الشارع وماره عليها سياره وباطتها حد الاحباط

تذكرون كنا نروح المدرسه ب 250 فلس ونشتري فطيرتين وسانكست وكاكاو بونجوم عشان نحلى فيه

تذكرون زحمة الكافتيريا ايام الثانويه ولي وصل دورك طق الجرس عاد نخش البطاط بالدرج وريحه الكتشب تفوح ويطيح علينا الاستاد

تذكرون لي قالو لنا حصه احتياط الابله مو يايه قمة الوناسه واخر شي يايه ابله العربي الميلقه تاخذ الحصه تبي تكمل المنهج......شدعوه شي مهم عاد

تذكرون الوالد لما ياخذ منه عيادي العيد يقول بيمعهم لك واخر شي اكــــــــال من هالشق لي هالشق

تذكرون برنامج سلامتك لما يقول عن الزقاير....قلبك...شراينك...جهازك
التنفسي....امتنع عن التدخين حالا شرايك تصكني كفين بعد

تذكرون لما نسوى شربت بينتو مو فيمتو ونحطه بقوالب ثلج ونحط فيه عود ضروس عشان يصير برد...عبقرين

تذكرون بالبر لما كان واحد من الاهل حاطله بياعه ويبيع علينا واحنا نبوق منه وابوه يزفه ليش الحساب ناقص

منقووووول

*
*

موضوع ذكرتني فيه بيت القرين في بوستها الأخير
واهو عن تلفزيون الوطن وجذبته عن شارع المطاعم

هذا الفيديو الي طلع بتلفزيون الوطن .. والإدعاء كان انه هل فيديو مصورينه بشارع المطاعم

لكن في الحقيقة .. الفيديو طلع مصورينه بالسعوديه .. وبوقت الصلاة مثل ما اذكرت الاخت في مدونة بيت القرين
وبالفيديو راح يكون واضح انه التصوير بالسعوديه

وتحياتي على الأمانة في النقل

تخلّف مجلسنا الموقر

طوال الوقت ونحن نسمع الإنتقاد للحكومة من الجميع .. فالحكومة هي وراء تردي أوضاع البلاد في جميع المجلات

لكن هل لنا اليوم أن نتكلم عن مجلسنا الموقر؟

لن أضع رأيي بالمجلس .. بل فقط سأعرض بعض المواقف الحديثة الكافيه لإثبات هذا التخلف المزروع في مجلسنا

الخبر : تمكن النواب من إقرار زيادة العلاوة الاجتماعية بواقع 50 دينارا للموظفين والمتقاعدين الكويتيين في القطاعين الحكومي والخاص وذلك لمن لا تزيد رواتبهم على 1750 ديناراّ

السؤال الكبير: شنو كان تفكير مجلسنا وهو يقر هذه الزيادة؟

التفكير واحد من جميع أعضائنا .. المصالح الإنتخابية
فلا تفكير من ناحية اقتصاديه ولا من ناحية العدالة بل فقط لمصالح شخصية انتخابية

الزيادة باختصار جاءت تقريبا باجماع النواب لانقاذ انفسهم من ضغط الشارع وايضا لتغطيه مواقف بعضهم وخسارت بعضهم الآخر في حرب اسقاط القروض

لكن مجلسنا لا يعلم بأنه لم يخدع الشارع .. بل خدع نفسه بهذا القانون

فالقانون ردّ إلا المجلس وهذا ماكان متوقعاّ، فقد كانت خطة الحكومة هي وضع دراسة شاملة وكاملة لكل الكوادر والمعاشات وتقديمها في فبراير، فما الهدف من الزيادة في هذا الوقت؟
أم هي فقط خطط انتخابيه سخيفه

لنرجع إلا القانون .. يقول القانون لكل شخص معاشه أقل من 1750 الحق في الحصول على الزيادة

لنفرض .. موظفان يعملان بنفس الإدارة .. أحدهم أقدم من الآخر في الإدارة وقد حصل على كل العلاوات الممكنه ومعاشه الحالي 1800 دينار
أما الآخر فهو أقل منه في العلاوات والمركز ويحصل على 1700 دينار
بعد الزيادة العبقرية
سيكون معاش الأول 1800 دينار .. أما الآخر فسيصبح معاشه 1750
بعد فتره حصل الثاني على العلاوة الأخيرة التي كانت تنقصه
وأصبح الشخصان بنفس المرتبه
لكن معاش الأول سيظل 1800 دينار .. أما الآخر فسيرتفع معاشه إلا 1850 دينار
أين العدالة في ذلك ؟؟؟

غريبه تلك القرارات المتخلفة .. التي لا تستند على أي فكر إقتصادي ..

*
*

منوعات من مجلسنا المتخلف

1
شوفوا الفكر الراقي من بعض نوابنا
يعني اعتراف صريح واشكره بمخالفه القانون وتحويل الأصوات
هذيل للأسف الأشكال الي انوصلهم مجلسنا



2
بعض كلمات السيد القلاف .. الي ليلحين مانسى المجلس .. وليلحين يحلم بريحته
يقول الأخ امس في جريدة السياسة

"وباضافة جديدة تماديا للمخالفة الشرعية السابقة وهي تحالف في وضح النهار بين السيد الرمز والأخ جمال الكندري ممثل الحركة الدستورية"

يا سلام على الفكر الراقي من نائب سابق دخل المجلس في ثلاث دورات متتالية


أتمنى بس الناس تسمع وتشوف .. وماينقص عليها بقوانين دايخه ما منها فايده غير اهلاك ميزانيه الدول على اي شي

تره بيدنا انغير هل مجلس

في النهاية
1
باقر المسكين .. أشكره على موقفه القوي
2
SALAM FM .. فكرة جميلة واتمنى لها التوفيق

أحلى جو

هذي أول تجربة لتنزيل بوست دايركت من برنامج ...

Microsoft Word 2007

طريقة عجيبة وسريعة .. بس يبيلي اتعود عليها

شي ثاني .. قلت اليوم اكتب شي سريع واحط بعض الصور .. لأني اكتشفت اني ما اقدر ابتعد عن المدونه مده طويلة .. صارت شي من حياتي .. جنه هذا يسمونه ادمان ؟؟؟؟

على العموم .. مالي خلق اكتب تعليقاتي عن الوضع الي صار بالديره الجم يوم الي طافو .. شي يضيق الخلق

بس للتاريخ .. ماراح ننسى الي وقفوا مع اسقاط القروض .. والي عارضوا ..

ماراح ننسى موقف حدس والشعبي بالي صار .. وماراح أنسى موقف باقر القوي ضد الاسقاط وغيره من النواب الي وقفوا جدام ضغط الشارع .. الي ماعندهم غير نبي اسقاط ونبي زيادات

على العموم باقي اسبوع على الرجعه للديره .. والوضع صاير ماينبلع اهني

هذي بعض الصور .. توصف الحاله .. والجو الي عايشين فيه .. ادعولنا :)

من قال جو الكويت مو حلو ..؟؟

والله صج صج الجو اهني الي ينبلع .. عيل واحد يعيش ب-20 .. وهذا تو الناس .. توه امبلش الجو

لاتشوفون السيارة اشلون تمشي .. جني راكب جيتي عند صالة أفراح عزة جعفر ليلة الخميس

*

*

هذا التخلف الموجود بدولنا .. اذا ما احرقوها بهل شكل يحرقونها بطرق ثانيه .. بالفسفسه الزايده .. روحوا الشوارع تشوفون أنواع الحرق

بهل فيديو كانو اشوي جريئين .. احرقوها دايركت

*
*

من أقوى المشاركات في شارع المليون اليديد

يقول .. حبيبي يعشق الياهو وانا مغرم مع الهوتميل .. اعجبتني هذي :)

يقول .. وانا اختلف معاه بهل نقطة
والله انـي كـنت كاشـخ فوق ميه ميه .. وجــو ديـرتـنا يـغير بـشـرة الـلبنـاني
من تعطل موتره غدا دجاجة مشوية .. ومن لهيب القيض يمكن يلبس الأكفان

ماكو على جو ديرتنا .. حتى بصيفها