Tuesday, August 12, 2008

إعتذار

أعتذر عن التقصير والتأخير الدائم في كتابة المواضيع

سفره تلحق الثانيه
شنسوي .. صيفنا بهالديره جذي .. ما نقعد فاضين

جدول سفراتي لن ينتهي حتى الأيام الأخيره من شهر رمضان

ان شاء الله بس ارجع الديره وافضالي جم يوم .. احاول على الاقل الاستمرار في كتابه سلسلة تناقضات الالحاد

شكرا للتعليقات ولكل من سأل .. وسامحوني ما قدرت ولا اقدر اتواصل معاكم بشكل جيد في الفتره القادمه

*
*

مرت سنه كامله على هذه المدونة ومن الحوسه نسيت اسوي احتفال بهذه المناسبه

أول بوست لي كان في 6-8-2007
والأيام تركض .. جني امس مبطلها

صراحه مادري شقول بهالمناسبه .. بس دامها اول سنه ماله داعي اهذر وايد .. الهذره والسوالف اخشهم حق السنين اليايه :)

شكرا لكل المتابعين

ونشوفكم على خير .. لا تنسونا بالدعاء

Saturday, August 02, 2008

ذكرى الغدر

لن ننسى أبداّ هذا التاريخ

هو مطبوع في ذاكرتنا ولن يمحوه الزمن

إلى اليوم اليابان تحيي سنوياّ ذكريات الحرب العالميه الثانيه التي دمرتها وذلك بعد أكثر من نصف قرن على ذلك التاريخ
ونحن بعد 18 سنه فقط .. لا نجد أي شيء رسمي يذكرنا بما حصل في ذلك الخميس

إن هم نسو .. نحن لن ننسى الغدر العراقي




تحديث .. شاهدوا الفيديو


هم لم ينسوا .. فهل ننسى ؟



*
*



ناصر الدويلة .. اشفيك يا بو علي ؟؟
تبي تصير ضمير الامه الثاني .. احنا واحد ومبتلشين فيه !!

مقابلة ناصر الدويلة على سكوب كانت تنرفز بشكل غير طبيعي .. بعد 18 سنه الحبيب يطالب بعزل قادة الجيش الكويتي أثناء الغزو .. شخباري .. منو ظل فيهم اصلا .. ثلاث ولا اربعه !!

وبعدين بدأ يعرض بطولاته .. انا الي اجتمعت وانا الي سويت ايام الغزو .. واهو وقتها ما كان إلّا نقيب

ويطالب باعاده تنظيم الجيش وتسليمه للقياديين الصغار .. مايدري تم تقديم 500 طلب تقاعد من قبل ضباط الجيش حتى الآن وذلك بعد العرض المغري المقدم للدفعات القديمه في السلك العسكري

بو علي الكل يدري لو مو الفرعية واخوك مبارك جان انت مو بالمجلس اصلا .. واذكرك باسمك عند ربعك بالجيش .. شوارسكوف الكويت .. الحجي الزايد ينقلب ضد صاحبه دايم وتره انت بس عقيد متقاعد مو لواء !!!

الله يهديك