Wednesday, April 30, 2008

نبيها منك يا الأزرق

تشلسي 3 - 2 ليفربول


ما قول غير

ياويلكم يا مان يونايتد



في موسكو


*
*

لمتابعة برنامج الوشيحي ليوم أمس عن المدونات

بين الأخ الطارق .. والأخ مطقوق

على قناتي في يوتوب

وهذا هو الجزء الأول




أكثر شي بط جبدي في الحلقة هو مداخلة فيصل القناعي الي يقول فيها بأن المدونين ناس خوافين يخشون الظهور في العلن

وأنا أرد عليه وأقوله .. للتدوين متعه إنت للأسف ما تعرفها .. بس ضروري إنك تتقبلها .. هذي لغة العصر يا الحبيب

وإذا وايد حارك إنك مو عارفنا .. تكفه دزلي إيميل و أعطيك رقم فنيلتي بعد مو إسمي

بس قتلك .. التدوين بهل طريقه له طعم انت مو فاهمه

*
*

التصويت : لاحظت وايد ناس يكتبونها بالقاف .. انا الصراحه اكتبها واقولها .. تكفه




هم عاجبني السمج .. هذا يسمونه يميام

Saturday, April 26, 2008

الأول في الأولى

بما أنني دائماّ متميز في الحصول على المراكز الأولى في التعليق عند زملائي المدونين
لذلك كانت الأولى دائرتي .. وهي الدائرة الأصعب في نظري .. خصوصاّ في التكهنات


تنقسم الدائرة إلى ثلاث أشكال من الناخبين
وهذا الجدول يبين النسب



حضر سنة:

يعتبر الحضر السنه أهم مؤثر في الإنتخابات القادمة .. فأصواتهم في الأغلب تنصب باتجاه الفكر بخلاف باقي ناخبي هذه الدائرة
فلا يوجد .. على الأقل بشكل واضح .. توجه أو تيار أو قائمه تجمع السنه بجميع أطيافهم
بل هي فقط تجمعات وقوائم لتيارات معينه .. كالتيار الإسلامي مثلاّ .. فهذا التيار يتمتع بقاعدة قويه في هذه الدائرة خصوصاّ في منطقتي بيان والرميثيه
في المقابل يوجد كثير من المستقلين الذين يحاولون التحالف مع بعضهم البعض لكسب أكبر عدد من الأصوات
لحسن الحظ .. لا يوجد تواجد ليبرالي قوي في هذه الدائرة .. فنجد التحالف يرشح مرشح واحد ليكون ممثل عنه في دائرة سيخرج منها 10 مرشحين
أتوقع قوه هذه المجموعه.. تكمن في ضعف باقي المجاميع .. عدد 4 سيكون ممتاز لهم


شيعة:

كانت هناك أفكار كثيرة وآمال كبيره لوصول 8 مرشحين من أصل 10 لقبة البرلمان .. وذلك بالإستقرار على قائمتين فقط والالتزام في التصويت على حسب المنطقة
لكن كل تلك الآمال تبخرت
فاليوم يوجد على الساحه 3 قوائم رئيسيه .. قائمه عبد الصمد وقائمة القلاف وأخرى لصالح عاشور
كل من تلك القوائم تتكون من 3 مرشحين
لا ننسى أيضا القائمه الجديده على الساحه وهي قائمة الأمين وأعضائها أيضا ثلاثة
ويوجد بعض المستقلين أمثال حسن جوهر وغيره
كل تلك الإنقسامات ستضعف كثيرا من قوه هذه المجموعه .. أعتقد بأن عدد 5 في البرلمان صعب وسيكون ممتاز جداّ لهم إذا حصلوا عليه


عوازم:

أضعفهم .. ليس لقلة عددهم فقط
بل يكمن سر ضعفهم في فشلهم في التكتيك الإنتخابي
فكنا دائماّ نقول بأن عوازم السالمية وسلوى أفضل من عوزام الخامسه وذلك لإيصالهم نواب يستحقون الوصول .. ليسوا بصامين كأبناء عمومتهم في الخامسه
لكن فرعيتهم هذه المره خذلتنا
وأكبر خطأ في فرعيتهم أنهم إختارو 4 مرشحين وبذلك تم إغلاق قائمتهم
مما لا يترك أي مجال لتبادل أصوات مع تيارات أخرى .. أو حتى مع أبناء عمومتهم المستقلين .. أمثال عبد المحسن المدعج مرشح التحالف الوطني وحسين الحريتي النائب السابق
أعتقد بأن عدد أثنين سيكون رقم جيد لهذا التجمع



أخيراّ

صراحه ماحب أقسم دائرتي لأقسام مثل هذي لكن محد فينا ينكر الواقع !!
أغلب الأصوات راح تكون على شكل التقسيم السابق

على العموم كل تجمع يمتلك من الأسماء الوطنية والإصلاحية الكثير ..نتمنى وصول الأصلح


هذي بداية لدائرتي .. بشكل عام وسريع
بس أوصل الكويت بالسلامة راح يكون هناك تفصيل أكثر لكل مجموعه وتيار .. وأيضاّ هناك أسماء ستطرح

*
*

شاهدت مقطع في يوتوب أثر فيني وايد
ذكرني بحال شباب الكويت .. الي ضايع بين مقولات مثلث الفساد وقوى الظلام وتيارات الفسق والفجور .. واهو مشاكلة مانحلت ولا يدري شلون بتنحل
أتمنى من المرشحين الإلتفات لمشاكل شبابنا شوي

تدرون أرض بجنوب السره على جم؟

مع المقطع



*
*

الغرض من التصويت الأخير .. معرفة مدى صحه كلام أحد الزملاء

قالي يا حبيبي اذا تبي تاخذ شاور تقول بروح اتسبح .. بس اذا بتروح البحر تقول بسبح !!
انا صراحه قتله ما تفرق

والنتيجه الواضحه .. الكل عاجبه كلمه بتسبح في الحالتين .. ولو انه الي رايحين البحر ماتفرق معاهم



*
*

طلب من أحد الأخوه نشر هذه الصورة
أتمنى محد يسكت عن هذه القضية .. إهي ماراح تكون واضحه هل جم يوم لكن قبل 17-5 بأيام ستزيد بشكل غير طبيعي
أتمنى النشر .. يمكن يحسون


*
*

آخر شي .. في أشياء الانسان كل يوم يمر عليها ولا يحس انها راح تكون سبب في تغيير حياته
مثال على ذلك حرف الحاء !!


قتلكم عاجبني السمج هل جم يوم .. هذا يسمونه حامر



*
*

سامحونا على القصور .. ما قدرت أرد على التعليقات في الموضوع السابق

لمتابعة برنامج انتخابات 2008 على الراي .. هنا قناتي على يوتوب

لا تنسون التصويت اليديد

Sunday, April 20, 2008

موجود ولاني بموجود

بكون بعيد هل جم يوم عن المدونة .. يمكن 10 أيام .. أكثر أو أقل

بعدها راح أنتهج نهج أسرع في التدوين حتى نتماشى مع سرعه الإنتخابات وحرارتها خصوصاّ مع بداية الشهر القادم

راح يكون تركيزي منصب على الدائرة الأولى بحكم تواجدي هناك
أعتبرها دائرة المفاجئات .. فهي في غموض كبير وصعب التكهن بالنتائج

*
*
هناك موضوع قادم عن أبو فارس .. وقد تأخرت في عرضه متعدماّ حتى أستطيع إمتصاص صدمة الحلقة الأخيره التي فقد فيها البيرق لصالح الشاعر خليل الشبرمي

وهذا الفيديو لناصر الفراعنة ( شاعر المليار) .. قبل عرض الموضوع


*

*

أما التصويت .. فأمتنع عن التعليق حتى يتم الإنتهاء من التصويت الجديد

*
*
بعض المقاطع السريعه من يوتوب

تسجيل قمت به لحلقة إنتخابات 2008 على الراي بين النائبين السابقين .. جمال العمر ومسلم البراك
وهنا لمتابعة البقية



في عصر الدعوة للمساواة بين الجنسين في كل أمور الحياة نضع هذين المقطعين


*
*

صور

عاجبني السمج هل جم يوم !! .. وهذا يسمونه الفسكر حق الي ما يعرف


وهذي سيارة واحد من الشباب .. كسر خاطري .. هل مره خلها بالشمس اشرفلك


ويعطيكم العافية

Tuesday, April 08, 2008

دواوين .. والصقر

تحديث

آخخخخخ لو بعض الناس تحت ايدي .. جان علمتهم شغل الله

قاعدين بغابه .. مو بديره قوانين
يطقووون القوات الخاصه ؟ .. مو اهي هوشه بمدرسه صح
!!
الميع يقول .. هذول العيال متيمعين عند بيتي !! .. هذول عيال !! الله يستر من الباجي عيل



*
*


موضوعي اليوم عبارة عن مقابلات قصيره مع بعض المتضررين من قانون إزالة الدواوين


أتوجه بسيارتي بإتجاه العاصمة .. وبالتحديد إلى منطقة كيفان العريقة .. حيث دوانية بو فهد اليومية

أنا : السلام عليكم

بو فهد : هلا والله بو جاسم .. حياك

أنا : شكراّ. هل لي بمناقشة أحد القضايا الحساسة معك يا أخ بو فهد

بو فهد : حبيبي انته .. اشفيك اتكلمني ابجدي .. قول الي عندك وخلصني

أنا : لا بس بصير رسمي اشوي .. خلني مصدق روحي يعني عندي مدونة وناس تدش تقرااا .. على العموم .. يقولون حايشكم انذار على هل الدوانيه العامره؟

بو فهد : اي والله .. قبل اسبوعين تقريباّ

أنا : واشرايك بالموضوع بو فهد؟

بو فهد : والله حالتنا حاله .. الي صج باط جبدي .. وين نروح الحين ؟؟؟ .. انا حياتي بهالدوانيه .. بيردونا على أيام حديقة كيفان مثلاّ ؟

أنا : واشفيها الحديقة ؟

بو فهد : يا عمي بالمتوسط انا !!! .. لا تذكرني بأيام الحديقة بين هالنمل الي يشقنا شق .. ولا اكو مطاعم اتوصل .. اللهم مضبطين المصري مال مطعم رش رش ساعات يوصلنا .. لا وكل يوم شكوى من البيوت الي حوالين الحديقه .. يقولون صراخ وازعاج !!

أنا : انزين وماكو غير الحديقة ألحين ؟

بو فهد : يعني بذمتك .. شوف ويهي .. انا ويه ستاربكس مرينا مثلاّ .. اهما هذا الي يبونه .. نقعد بهل مجمعات ونتطمش على الرايح والي راد !!

أنا : يا أخي مو لازم مجمعات .. روحو القهاوي !!

بو فهد : لا تسوي روحك غشيم .. مباراة مدريد ولا برشلونه يبيلك تروح من العصر عشان تحجز مكان زين بالقهوه .. ولا تبي نقولك اشصار بقهاوي شرق وغيرهم !! .. كل شي انشال !!

أنا : والله مادري شقولك الصراحه .. هاردلك

بو فهد : أهما بس لو ناطرين لي باجر .. ودي أشوف ارسنال وليفربول مع الشباب .. !!




إتجهت بعد ذلك لمنطقة بيان العظيمة .. منطقة صنع القرار في بلادنا العزيز .. وإلى دوانية أخرى جميلة بريئه محترمه ذات أخلاق عاليه .. لو هي بنت جان خطبتها

أنا : قوه يويسف

يوسف : يقويك يبه .. حياك حياك

أنا : الله يحييك .. هاااا يقولون كلها جم يوم وتطير هالدوانية الحلوه الجميلة البريئه

يوسف : إتصدق عاد .. باجر بنفضيها .. هاا شرااي !! .. عندي البلياردو هذي طايحه بجبدي .. مالها مكان داخل البيت

أنا : لا يبه .. وين أحطها .. والله عاد حرام فيها ذكريات !! إنزين أقولك .. إشرايك بالإزالات بشكل عام ؟

يوسف : شوف حبي .. السنه الي طافت قالو شيلو السور شلناه .. قالو شيلو الزرع والشير .. هم شلناهم
إحنا مع الحكومة .. مافي أحد ضد الحكومة .. وكلنا نبيها تطبق القرارات هذي

أنا : عيل اشفيك زعلان بعد جبدي ؟

يوسف : أنا أقولك ليش .. شوف .. طل بره الدوانيه شنوو تشووف
تشووف براحه مهجوووره .. هذي البراحه في مخطط الوزارة المفروض اتكون فرع جمعية .. لكن تم تغيير مكان الفرع لأسباب محد يعلمها وصارت براحه فاضيه بنص بيوت
أول ماسكنا .. كانت كرمك الله مكان تجمع جلاب .. كل جلب ضايع تلاقيه يفتر بهل براحه
بعدها بفتره .. لأ تطور الموضوع
صارت براحه مشهوره بالمواعيد الغرامية ( جلاب من نوع ثاني ) .. بحكم إحنا قراب من معهد تدريس لأحد الشركات الخاصه .. صارت البراحه مكان غرامي مو ناقص غير شموع او ورد

أنا : كل هذا بهالبراحه الدايخه !!

يوسف : اي والله هذا الي كان صاير .. بس بعد مابلشنا بهالدوانية وهم هل جم جار الي يمنا نفس الحاله .. خفت هل خرابيط .. بحكم انه المكان صار حي .. مو مهجور مثل قبل

أنا : يعني انتو ابطال الحين ؟

يوسف : لا ما قلنا جذي .. بس النقطه .. المكان مهجور ولا فيه أحد .. شنو أملاك الدولة هذي الي بايقينها احنا .. براحه كامله مهجووووره !!
يعني احنا لا ضارين أحد .. ولا أحد ضارنا

أنا : والله مادري شقولك يا الحبيب .. توك تقول مع قرارات الحكومة .. والحين مو عاجبك .. حيرتنا يا أخي !!

يوسف : حبيبي .. خل يدرسون كل حاله بحده .. يعني في ناس صج متعديه .. مثلا واحد بينه وبين دوانيته شارع .. ولا واحد باني الدوانيه حاجب الرؤيه ولا مأذي الجيران ولا غيره وغيره
لكن براحه فاضيه .. ومهجوره !!
شالهدف يشيلون دوانيه بهالمكان المهجور !!

أنا : الله أعلم !!!



الخلاصة:

في فئات وايد ماراح تتأثر بالموضوع هذا .. لكن لو ننظر لفئه الشباب !!
169 ديوانيه في اليوم الأول للإزاله .. على الأقل رواد كل دوانية ( فيها ) 15 شاب !!
هالعدد الكبير .. بعد ماكان يجتمع في الدواوين .. الحين وين تبونهم يروحون .. شقق بحولي مثلاّ !!

محد يقدر يغير قرار مثل هذا .. ولا نبيه يتغير .. لكن كان ودنا يكون تطبيقه بصوره أفضل وبعد دراسه أكثر
فالدواوين شي تمتاز فيه الكويت عن العالم كله
للأسف سنفتقد كثير منها في الأيام القادمه :)

*
*

واحد سماه شيخ الليبراليين !! مادري اذا هذا الوصف يعجب ربعنا الليبراليين ولا لأ

بس صراحه .. مادري اشلون الناس تدافع عنه

يعني أتركم مع الفيديو وانتو حكموا



يعني بغض النظر عن مقاطعات السعيدي .. وإختلافنا الشديد مع آرائه

بس أقوله يا الديناصور
( الظاهر حبيبنا وايد متعقد من فؤاده ووصفه لربعه بالديناصورات .. فصارو العالم كله بنظره ديناصورات !! ) ... وأقوله إتخسي بعد !!!!!!!!


هذا لسان شخص مثّل الأمه لسنوات وسنوات

تكفه يا ناس .. حكمو ضمايركم بتصويتاتكم القادمه .. انتو بصوتكم هذا تسلمون الشخص مستقبل عيالكم !!
مستقبل بلسان جذي .. الله يستر من هالمستقبل !!

*
*

اليوم البيرق لفرعون الشعر إن شاء الله

والحرب بعد بين الريدز والمدفعجيه .. وان شاء الله الأزرق ينطرهم بنصف النهائي
:)