Tuesday, January 08, 2008

الهدوء الذي يسبق العاصفة

تحديث
وفقت الوزيرة في الاستجواب .. كان الاستجواب بشكل عام راقي جدا
اتوقع أن المعارضين لن يتمكنو من الحصول على العدد المناسب لطرح الثقة
يا خبر اليوم بفلوس :)


اكتب هذي الكلمات قبل توجهي إلى الفراش .. وذلك استعداداّ لحضور جلسة استجواب نورية الصبيح يوم غد

هو من اصعب الاستجوابات .. فليس هناك سيناريو واضح لما سيحصل بعد ساعات .. كثير من الكتل والنواب لا تملك مواقف ثابته .. كل السيناريوات معروضه .. حتى حل مجلس الأمه يتم تداوله بقوة

لذلك قررت إني أغير المود اليوم
واجعله هو البوست الذي يسبق العاصفه المتوقعه



أول شي تعليق بسيط على نتايج الإستفتاء الي تم التصويت عليه في المدونه

بالنسبة لي اعتقد بان الاجابة الصحيحه هي اجلكم الله .. انعالي انباق .. انولدت وانا اقولها جذي
والدليل على ذلك .. اذا نبي نقولها بالفصحي .. سنقول .. سرق نعالي .. فيكون النعال مذكر

احتمال اكون غلطان

لكني سأحاول أن أقنع نفسي بإجابة الغالبية هنا
وهي انعالي انباقت

لدي نظرية تقول بأننا ككويتيين يجب أن نتفق على مصطلحات معينه .. حتى تكون لهجتنا خاليه من الشوائب :)


*
*



هذي صورة لأجزخانه في مصر .. تنفع للجميع
سواء كنت انسان او غير ذلك


*
*

وأخيرا

أتحدى الجميع
تحدي تحدي تحدي تحدي تحدي

وله جائزه قيمه .. الي يقدر يشوف الفيديو هذا كامل بدون ما يضحك




تحياتي .. ضحكوا قبل اخبار باجر :)

39 comments:

حمودي said...

الله يستر

Q8i_Blogger said...

حمودي

اي والله
الله يستر :)

Eng_Q8 said...

رحلة سعيده :))))

بعدين ليش تحرني ياخي ودي اروح بس المرض عائق مع الاسف

وبعدين الجواب انعالي انباقت مو انعالي انباق

وبالنسبه للكرخانه قصدي الاجزخانه هذا الي يقولون عنه بتاع كلو

ماظحكت :)))))))))))

Q8i_Blogger said...

Eng_Q8

افا والله .. قولي يبه
انا امرك .. ولا تحتر ولا شي
ونحاول انييبلك استثناء .. فراش بالمجلس

انعالي انباقت .. معني مو بالعها

ما اعتقد .. محد يقدر يشوفه ومايظحك

فتى الجبل said...

بالنسبة لنظريات النعال
شوف عاد الصح انعالي انباقت
وكفاية بدليات:p
أما بالنسبة للحل فبصراحة آنا أتمنى حل المجلس واعادة الانتخابات على أساس الخمس دوائر يمكن ياخوي يتحسن المجلس حتى لو بنسبة 30% هم أحسن من الحين
أما الصيدلية فلا تستغرب من هالشي
لأن الانسان العربي عند حكوماته يساوي الحيوان مكرم السامع اذا مو أقل

joy said...

يا لهوي يا لهوي يا لهوي


نبي تفصيل عن المرأة الحديدية لو سمحت لمن ترجع



وانعالي انباقت



والفيديو مو طبيعي ليش ما عندنا يهال جذي يضحكون
بلوووم

5roofa said...

يااختييييييييييي

وااي يهبل يهبل يهبل لوووول

على الحل لوول انا اقول انعالتي انباقت
و راح استمر في قول انعالتي انباقت لوول
:P
3nad

و موفق بالرحله لوول تروح و ترد بالسلامه خيو

salamz dear friend...

Q8i_Blogger said...

فتى الجبل

خلاص انعالي انباقت وانت بكرامه
انتو الاكثريه
شنسوي بعد

اما بالنسبه للحل
اهوا انا معاك
احسن الصراحه
بس لو ينطرون لي الصيف .. علشان يمديني ارد اصوت
مايصير هل حجي
انتخابات وانا بره الديره !!

Q8i_Blogger said...

joy

المرأه الحديديه كانت حديديه بالاستجواب .. بس مايندرى اشلون بجلسة طرح الثقه .. اخاف الحديد يصدي

اي صج .. الله يعوظج ؟ منو باق انعالج؟

يهالنا بس سعابيل وبجي .. مايعرفون شي ثاني
فيني عقده انا .. ما اشتهي اليهال :)




5roofa

مايصير .. غلط
الي رسينا عليه .. انعالي انباقت
واذا كلش كلش
انعالي انباق
بس شنو انعالتي .. مستحييييل !!

سلام ابله

Anonymous said...

بالنسبة لي اعتقد بان الاجابة الصحيحه هي اجلكم الله .. انعالي انباق .. انولدت وانا اقولها جذي
والدليل على ذلك .. اذا نبي نقولها بالفصحي .. سنقول .. سرق نعالي .. فيكون النعال مذكر

لا لست مخطأ يا أخينا الكريم
على العكس أنا مستغربة من أعلى الإرادات تنتمي إلى انعالي انباقت .. !!

والفيديو سبق وأن رأيته ( يهبــــل بسم الله عليه ) شكرا جزيلا على ما تقدمونه :) بارك الله بكم

أما السياسة أنا بعيدة عنها لأنها لاتخلوا من الشووائب والثغرات وووو
إجابياتها قليلة نسأل الله أن يوفقنا وإياكم إلى ما يحب ويرضى

نفسي عزيزه said...

بقول شي بس لايزعلون الحريم
النعال -اعزكم الله- لفظ مؤنث فالمفروض إنباقت مو إنباق


إنزين شنو بيصير إذا إنحل المجلس ؟
>>وحدة ما تعرف بالسياسه

Anonymous said...

لول انعالتي ؟ لالالالالالا .. انزين في أحد يقول بطني تعورني ؟!
حطلنا استفتاء خنشوف :D

اليوم اول مرة بحياتي اشوف استجواب ! يمااا مسكينة نورية ، بس ما همها و لا هالطول ! و الاجابات كانت بعييييييييدة عن الاستجواب ;/

سؤال للسياسين ، شنو يعني جلسة طرح ثقة ؟!
plz

Q8i_Blogger said...

killie thiqqa

حلو اتفاقج معاي .. انا طول عمري اقولها جذي
بالاستفتاء هذا شكيت بروحي :)

اما بالنسبه للسياسه .. اهي صح فيها شوائب .. لكنها اهم شي بديرتنا الكويت
تجعل الشعب هو من يحكم نفسه

بس للأسف بعض الممارسات شوهت وجه السياسه لدينا
بس ان شاء الله هي فتره فقط .. ونرجع لأمجاد الماضي

Q8i_Blogger said...

نفسي عزيزه

انا الي اعرفه انباق .. لكن انا رجل ديمقراطي .. والقرار تم على انباقت
صج مو مقتنع .. لكن رضينا بالديمقراطيه منهج :)

اما بالنسبه لحل مجلس الأمه
هو باختصار .. اعاده انتخابات مجلس الأمه على حسب النظام اليديد .. الخمس دوائر
يعني ماراح يصير شي غير تغيير بعض الوجوه في مجلسنا الموقر

وسلامتج :)



Biznscheya

صح .. حتى سالفة البطن في اختلاف كبير
لازم احطلي تصويت بهل سالفه :)

اممم
اول مره تشوفين استجواب .. ممتاز
بس على فكره .. تره ليلحين ماشفتي شي
الاستجواب لي الساعه 4 يمكن
يعني تو الناس

وتره هذا من ارقى الاستجوابات على فكره
وماصار فيه اصراخ ولا هواش
يعني مر بسلام

ونوريه كان تقديمها وايد زين .. لو نقارنه بالاستجوابات السابقه

اما بالنسبه لجلسة طرح الثقة

جلسة راح يتم عقدها للتصويت .. على طرح الثقه .. الي يعني انها ماراح تستمر وزيره .. او عدم طرح الثقه

يسبق هل شي طلب لعقه هذي الجلسه .. والطلب تم تقديمه اليوم !!

باجي الجلسة مالت الطرح .. تحدد فيها استمرار الوزيره بالوزاره

وتحياتي
ويعطيج العافيه على المرور

vancouver said...

نبي بوست تقول في انطباعاتك عقب الجلسة


----

انا اقول الاحسن يبا نقول
شبشبي اتسرأ

كلنا جم طوطو ومو متفقين على كلمتين
ومصر ام الملايين كلهم
يقولون
شبشبي اتسرأ

الا اذا عندهم بلوغر مصر بيقول
شبشبتي اتسرئت
:P

اببببببببببببببببشرك

ذاب الثلج وبان المرج
والحرارة وصلت 13 فوق الصفر
كلولووووووووووووووش

فتى الجبل said...

طالبوا يكون لكم تصويت بالسفارة مثل بقية خلق الله

فريج سعود said...

انا اقول السؤال غلط ويجب ان يكون
سرقت نعلي
او
نعلي سرقت
وغالبا ما تكون السرقة بالمسجد

5roofa said...

ليش انعالتي انثى لانه احنا حريم فكل شي نلبسه يصير انثى
انعالتي
بطنتي
شباصتي
ترجيتي

لاحظ التشابه


بس انتوا الرجال نعالي يصير لوول
بطني
دلاغي
سويجي

شرايك و انا اسوي قواعد من كيفي
لوووول

:p

salamz dear friend...

Aldenya said...

كاسره خاطري نورية الصبيح
الله يكون بعونها


عموما
هالاستفتاء
سبب لي زوبعة فكرية
مادري
هل انا اقول
نعالي انباق
او نعالي انباقت:/
صراحة
نسيت
:/

الخيلاء said...

بيضتها نوريه ماقصرت :)

اما مصر عادي .. سهالات المهم مايتخربطون بالادويه لول

و الولد و ابوه .. ما اردى من المربوط الا المفتلت لوول

بوست خفيف :)

Najmah said...

انا بعد اقول
نعالتي انباقت

:P


كان عندي امتحان
وشفت الاستجواب هرووبا من الجراسه :)

صراحة عجبتني

تحياا المرأة :P

أبو شملان said...

ياحلو الياهل


تبي الصج ما قدرت امسك نفسي :)

Najmah said...

امبيييه بدلية

قصدي الدرااااسة

:)

Eng_Q8 said...

نوريه باقيه بالوزاره انشالله

Q8i_Blogger said...

vancouver

انطباعي .. زحمه وماكو مكان بالقاعه .. والكل قاعد بره
ومادشيت :)

اما بالنسبه للجو

انتو الجانب الغربي .. يحليلكم

احنا الجانب الشرقي من القاره .. لاتشوفين الجو

لا 13 ولا هم يحزنون .. كله ماينس
:)



فتى الجبل

؟!
الله يهداك يا اخوي .. احلام يقظه هذي؟
تدري ملحق ثقافي ماعندنا بالسفاره
تبي تصويت؟
كندا .. قاره .. ومتروسه كويتيين
ماكو ملحق ثقافي مسؤول عنهم
خلها على الله بس

Q8i_Blogger said...

فريج سعود

على راحتك يا الفريج
تبي انغير السؤال انغيره
واذا ودك حذف اجابتين هم حاضرين :)



5roofa

انا اشهد انج ابله

بعد بسكت وماني راد

عط الخباز خبزه .. ودام الابلات تحجو انا اطلع بره الموضوع احسن :)

Q8i_Blogger said...

Aldenya

قولي الي يعجبج ولا يهمج شي
انا اكتشفت انه السالفه مافيها اي اتفاق
وهذا شي غريب
عادة الكويتيين يتفقون خصوصا في مواضيع تخص اللهجه
بس اهني اشوف وايد اختلاف بهل جانب




الخيلاء

خبل الولد وابوه
بس ساعات نحتاج ناس جذي
حق الضحك ممتازين :)

Q8i_Blogger said...

Najmah

حسافه صدتيها
كنت ناويلج على نيه :)
جراسه عاد .. ههههه

واشقصدج بتحيا المرأه
شيصير بالرجل ؟؟؟؟
:)




أبو شملان

ومنو يقدر
انا قلت اتحدى
وانا قد الكلمه .. وادري محد يقدر يغلبني :)




Eng_Q8

اتفق معاك .. حدس حسمتها .. متأخر كالعاده

someone_q8 said...

السلام عليكم

لقطة الضحك هذه المفروض اتحطها حق اللي يبون يطرحون الثقة :))

Najmah said...

لووووووول
اشواا الحمدلله

مو قصدي شي قصدي عااشت
والرجل يحيا ويعيش معاها =)

لوول
الفيديو عجيييب

Selezya said...

هههههههه هالفيديو شايفته قبل وماقدرت اسكت :)

وهيااا انعالي انباقت :P
اشوه مو بس انا

Dalal said...

بدعت نورية الصبيح الصراحة

واعجبتني ثقتها في نفسها

كانت أسئلة النواب بسيطة وضعيفة وردودها قوية

وبالنسبة حق الاستفتاء

انعااااااااااااااااالي انباقت

صارت قضية

:)

مشكور يا كويتي بلوقر على مرورك لمدونتي سعت كثيرا في تعليقك

تحياتي

Anonymous said...

سعدت كثيرا بالاستفتاء لانه جاء على حسب ما جاء في تعليقي للاستفتاء بوست البيبي وايد حلو واعتقد محد يقدر يكبت ضحكته

مجهود حلو وتغير لا باس به


( شداخه) (ايميل

Fahad Al Askr said...

شنو اخبار باجر

حياتي هدف مو عبث said...

أتوقع الأخير صحيح :)

وخوش فيديو حده يونس هالطفل

Q8i_Blogger said...

someone_q8

ماله داعي .. انا بحضور جلسة وحده من جلسات المجلس اضحك اكثر من الياهل هذا
:)



Najmah

@@
عبالي الرجل مو معاها
:)



Selezya

مبرووووك
بس على فكرة .. تره الكيبور ينباق .. مو تنباق :)

Q8i_Blogger said...

Dalal

العفو تسلمين

اكيد النعال صار قضيه
اذا الاستجواب هذا التافه عفس الديره
ماتبين قضيه مثل هل تصويت نهتم فيها
بالعكس انا اقول ابحاث في هل قضيه اهم مليون مره من تحليل محاور الاستجواب
:)
تحياتي



شداخه

شكرا على المدح .. وسعيد بمرورج :)

Q8i_Blogger said...

Fahad Al Askr

عندي آخر نكته .. ودك تسمعها ؟
:)


حياتي هدف مو عبث

شكرا على المرور
تحياتي

حياتي هدف مو عبث said...

توني أشوف
الإستفتاء اليديد

المشكله إني أقول بطني تعورني

وفي بعد 2 غيري

والباجي

بطني يعورني

:(

الظاهر إني من المريخ

:p