Saturday, January 05, 2008

تقليد واستفهامات


قال رسول الله صلى الله عليه وعلى آله وسلم: (لتتبعن سنن من كان قبلكم،حذوالقذة بالقذة حتى لو دخلوا جحر ضب لدخلتموه،،قالوا يارسول الله اليهودوالنصارى؟قال :"فمن؟!)

كأنه يرانى في هذه الأيام
أشجار الكرسمس تنتشر في كل مكان
والاحتفالات بمولد ابن الرب -كما يدعي المسيحيون- منتشره بين المسلمين بشكل واضح


رأينا ما قاله العمانويل غريب في مقابلة له في الوطن .. والتي كانت للأسف تحتفل بشكل غريب باعياد الكرسمس
قال باختصار .. اذا رجع المسيح نحن في الجنة وانتم في النار
وقال نحن لا نتبادل الزواج مع المسلمين

هذا الوضوح في الطرح .. للأسف مفقود لدينا .. فنحن نحاول أن نحوّر في ديننا حتى نقترب منهم

*
*
*

تتكرر الإستفهامات حول جابر الخالد وزير الداخلية الحالي

كان رئيس أركان .. فلم تتجاوز مدته السنه .. وفي العاده تصل المده إلا العشر سنوات
أصبح سفيرا للكويت في المملكة .. ولم تتجاوز فترته السنتين .. وعادة تكون الخمس سنوات واكثر

واليوم الإستفهام الكبير .. التجنيس ؟!!؟
بعض الأسماء المشبوهه وأشهرها الصبيح .. شي يدعو للإستغراب
لماذا لم يقم بعرض الأسماء للجنة محايدة وثم تعرض على مجلس الأمة قبل إقرارها

*
*
*

لم يكن رأس السنة كباقي الأيام بالنسبة لي

فقد حاولت أني أحتفل بهذه المناسبة الحزينة - لأننا نودع سنة وندخل على سنة ونحن مكانك قف كدولة وكشعب - بأفضل أماكن السياحة لدينا في الكويت

أولا فطاير شويخ



بعد ذلك سوق المباركية






يالها من ليلة :)

*
*
*

أخيراّ
هوا مين شريف ده ؟؟؟



نتايج التصويت تثير كثير من الأسئلة .. تعليقي على النتايج .. مؤجل :)

36 comments:

Anonymous said...

انعالي انباقت

Fahad Al Askr said...

ودي أعلق، بس ضعت، شكو غريب بكافتيريا شويخ بوزير الداخلية بكشف التجنيس

عموما أنا أقول نعالي انباق، لأن النعال مذكر، والفاعل عادة ما يكون ذكر أيضا

Maximilian said...

باقوا انعالي

انعالي انباق


لووول

m_bet0hm said...

عــــــــاجل جدا :- دعوة الى كل مستخدمين البلوق سبوت


1-
http://mbet0hm.wordpress.com/2007/12/16/wordpress/

2-
http://7lablog.com/archives/359#comment-1369


ولمعرفة طريقة الانتقال من البلوق الى الورد برس بدون ضياع اي موضوع لك

ادخل الرابط التالي
http://brhom.net/?p=274

ولان الورد برس احسن ندعوكم للانتقال الى حي الرخاء والراحه ..
****
وان كنت تريد ان تفتتح لك مدونة وماتعرف الطريقة
زور الموقع التالي
http://lacadette.wordpress.com/


مع تحياتي
مضيعه بيتهم
http://mbet0hm.wordpress.com/

Q80 Blogger said...

حمودي

ماعتقدش :)




Fahad Al Askr

هلا والله اخوي العسكر
شكلها اول زياره لك لهل مدونه
لأنه بوستاتي كلها جذي كوكتيل
على المووود امشي :)

واتفق معاك بالي قلته .. النعال مذكر
بس مادري ليش الناس عاكسه الموضوع

Q80 Blogger said...

Maximelian

اشهد انك دكتور :)
انا معاك بالي تقوله :)



m_bet0hm

لا مشكووووره
انا فرحان اوي اهنيييي :)

حياتي هدف مو عبث said...

بالنسبه للمصخره الي كانت من إحتفالات
الصراحه لازم نشفق عليهم ترى مساكين ضايعين تايهين .. حتى الحرام والشرك يزيونه وللأسف هذا من خطوات الشيطان لشيء أكبر وأكبر وباجر يعلقون الصليب عادي والعذر الإيمان بالقلب

..


غريب !!! إهو غريب فعلاً
حراام ترى أهوا في ضلال كبييير
الله يعينا على نفسه
وياي يتفلسف علينا
وأهم شي سالفة النار والجنه
شر البليه مايضحك
الله يهديه ويهدي الجميع

..


التجنيس أو التنجيس وهذا مسمى أفضل
أقولك شي عندك فلووس ؟؟ عندك واسطه ؟؟ منافق ؟؟ تعيش
بس ما يدرون إن الله على الظالم وربي بحاسبنا كلنا

..

وبالعافيه وزين في ناس تشرب ماي
مع الأكل طبعاً إذا كان مااي
والمباركيه عجيييب تحس جوو ثاني

حياتي هدف مو عبث said...

نسيت الفيديو :)

شرريف !!! خوش شي والله
ويمكن إهي مسيحيه << حسن الظن زين :p

والحبيب حتى ما قال صلى الله عليه وسلم
ماكو حتى أسلووب

مالي خلق أطلع الحره ههه

ButterFlier said...

i need to drink,
عشان أقرأ بوستاتك

Anonymous said...

عزيزي كويتي بلوقر

أتفق معك إلى حد ما في تقليد الغير في كل ما يفعلون.
أنا لست ضد المشاركة في إحتفالاتهم و لكن ضد المغالاة في هذا الإحتفال كأنه عيد تعود عليه الأجداد في الإحتقال
ولكن يا عزيزي لا تلوم هؤلاء التائهين..ولا تلوم من يريد أن يجد أي مناسبة ليفرح بها مع أسرته..فالديرة غلقة و مصكوكة...يبحث بها المواطن و المقيم على أي مناسبة للإحتفال مع أسرته

أليس الإحتفال بعامة الناس أفضل مما يدور في صالات الحفلات المغلقة ؟ أليس هذه الإحتفالات أفضل مما يدور في مخيمات تجنيد الإرهابيين و غسل مخوخهم بشوية أناشيد تروج للعنف و الدماء ؟

عزيزي أنا أتفق معك و أختلف بنفس الوقت فإسمحلي على هذا التناقض.


بالنسبة لوزير الداخلية الذي يريد الكثيرين وضعه تحت مقصلة الإستجواب ليس لتجاوزات قد إستمرت لعشرات السنين و لكن بسبب إختلاف توجهات الوزير مع معازيبهم فهذه هي خلاصة الزبدة من هذه الجعجعه السياسية


فطاير شويخ لا يعلى عليه و يعد بالنسبة لي شخصيا من أفضل مطاعم الفطاير..أنصحكم بـ 3 لحم و 2 جبن و وحدة سبانخ معاهم بطل لبن..وإدعولي عقب التريوعه

و عوافي للجميع :)

Q8DOLL said...

ماشالله عليك دايما متنوع بطرحك
واستشهادك بالحديث مابعده كلام
أما سالفت التجنيس
تزيد وضعنا بؤس
شنو هالسياسه الداخليه اللي مافيها شي عدل

خووش احتفال
والله بالعكس احسن من غيرك حفلات ومسخره
صج الاماكن اللي رحتلها مكان رجل
مو عفلنقي
تحياتي

Cr8ivia said...

ahhhh ya wazeer ildakhilya wil tajnees !!

inbagat in3ali :P

Anonymous said...

for the first part, things like that used to puzzle me but not anymore. basically because the Kuwaiti personality lacks the integrity.

فتى الجبل said...

شوف شنو تصرفات اسلاميينا معاهم وتعرف ليش تحجى جذي
وتذكر ان لكل فعل ردة فعل معاكسة له بالاتجاه ومساوية له بالقوة
وللأسف معظم العرب امتهنوا التطرف بغض النظر عن دينهم

Eng_Q8 said...

هذي الكويت صل على النبي

احلى راس سنه :)))

بالعافيه

الحارث بن همّام said...

كافتيريا شويخ..

لا تفتح الجروح ياخي :)



اللهم صلى على شريف

joy said...

انعالي انباقت بليييز

بس بعد كش التجنيس بنقول انعالتي انباق

كااااااااااااااااااااك




وانا معاك الف في المئة على الكرسماس




احلى شي فطاير الشويخ

اجدع ناااااس

:)

مين ده شريف؟

Anonymous said...
This comment has been removed by the author.
someone_q8 said...

السلام عليكم

ما بعد الحديث كلام افضل منه
###

بالنسبة للوزير خلوه على راحته لان اللي اشوفه ان له سياسة غير واسلوبه غير واعتقد ان اهوه لما كان بالجيش الكل يمدحه من اعلى رتبة الى اقل رتبه
ولاتنسون ان اهوه اخبر منا في النواحي الامنية وهذا رأيي فيه

لك مني كل تحية واحترام

esTeKaNa said...

مساك الله بالخير اخي العزيز
!!
ينعت من يستنكر الاحتفال في راس السنه بالرجعيه وبالمغالاة في دينه
!!
والمسأله ببساطة مسأله عقيده
هم يقولون ان سيدنا عيسى رضي الله عنه ابن الله ونحن موحدين حتى يوم الدين
الله واحد احد لم يلد ولم يولد سبحانه
الاحتفال براس السنه تأكيد على عقيدتهم تشكيك بعقيدتنا
هم يعلنون عقيدتهم بسلاسه ونحن نخجل من ذلك
!!
ليس تشدد
وليس تهويل وقسوة منا
نحن اولى بالمعامله الجيده لهم فنحن احفاد
الصادق الأمين من كان خلقه القرآان
عاش مع الذمين
واعطاهم الأمان وطيب المعامله

يزاك الله خير على هالكلام:)

فطاير شويخ
الله
ذكرى الجامعه
وبريك الساعه 12
ومشوارالراحة عقب دراسه المكتبه
اياااام
:)
هني هني

vancouver said...

كويتي بلوغر

ها..نورت كندا بطلتك والا لما الحين
الجامعة بتبلش بااااجر
ههههه


____

يحليلك
عيل شتقول بناس اعرفهم يودون عيالهم
ويوقفونهم بالطوابير
عشان يتصورون مع بابا نويل
ويوقلوهم شنو يبون بالعيد
ويبروزون الصوره بغرف عيالهم
واهمه مصلين مسمين
ولما حاشيتهم
قالوا
هذا شيء وذاك شيء

شكووووو اخلي عيالي يحتفلون بعيد مو عييييييدهم
شكوووو؟؟؟

---

كويتي
مع فهد
وباقي الشلة
اللي تذكر النعال
مع احترامي لكم
بس الجوتي مذكر
نقول هذا الجوتي
وهذي النعال
عمممممري
ما سمعت احد يقول هذا النعال
مثال اخر
ما نقول اخذ النعال وحطه فوق الرف
نقول
اخذ النعال وحطها فوق الرف
واخذ الجوتي وحطه فوق الرف
لانه مذكر

يعني الله يهداك فتحت موضوع مشووووق للحديث
لووول


---

تصدق كل عمري اسمع عن فطاير شويخ
ولا عمري ذقتها
-
عليك بالعااااافية

Najmah said...

من تشبه بقوم فهو منهم

والله استغرب
لنا هويتنا اللي تميزنا
شلون نتخلى عنها واهيا اساس كل شي

المفروض نفتخر ونعتز فيها
مو احنا اللي على حق؟

شلون نحتفل معاهم والشي يمس اساس عقيدتنا؟

عن انس بن مالك رضى الله عنه قال رسول الله صلى الله عليه وسلم: »ولهم يومان يلعبون فيهما« فقال:»ما هذان اليومان؟« قالوا: كنا فيهما في الجاهلية، فقال رسول الله صلى الله عليه وسلم: »ان الله ابدلكما بهما خيرا منها: يوم الاضحى ويوم الفطر«.

....

احلى شي فطاير شويخ :)

Anonymous said...

انا بعد بصوت على النعال

عموما النعال مذكر لكن لما تبي تقول ان النعال انباقت فانت تنسب النعال لك لانها انعالك فتقول انعالي انباقت والتاء ضمير مستتر تقديره انت

المهم تروح وترجع بالسلامه

شداخه

إبنة الشريعه said...

سبحان الله لهدرجه كفتيريا شويخ مشهوره ,, حتى بالمدونات طرت سيرتها :)

ودي بصفيحة لحم ألحين
بس عندي تساؤل : المخلل ليش يحطونه بجيس ورق للحين مو داش هالشي إبالي
_

مبين ان الأخت عايده مسيحيه ويهها إنقلب عدل

Q80 Blogger said...

حياتي هدف مو عبث

أول شي .. ابشرج في مسلمين ابسو الصليب من زمان .. يعني كول وموضه

وعلى الماي الي بفطاير شويخ
انا دايم ماي .. ما اتعامل مع البيبسي .. يا ماي يا عصير
شطوور يحليلي :)

واذا على الفيديو .. لاتحرين نفسج .. وصلنا زمن نسو فيه العالم كله .. شي اسمه دين .. صار شي ثانوي بحياة الناس للأسف

ويعطيج الف عافيه



ButterFlier

لو ادري جان وزعت على لكل .. لبن من فطاير شويخ :)

Q80 Blogger said...

عتيج الصوف

الاحتفال بشنو ؟ براس السنه ؟
من متى قامو الكويتيين يحتفلون بهل مناسبه ؟
ما اذكر يدي كان يقولي عن هل احتفال

صراحه انا ضد الاحتفال بشكل عام
يعني اليوم نحتفل بحفله فيها مطرب ونتعشا .. باجر الناس ماتوقف على هل حد .. راح تزيد

والحين يا اخوي بتقنعني انه الي يروحون مخيمات ويسوون هل خرابيط .. راح يبطلون اذا احنا سوينا حفلات بشكل رسمي !!!

اصلا الحفلات المحترمه موجود طول السنه ولا احد قال شي

لكن الملاحظه اهي على المسخره الي تزيد بهل يوم .. وتقليد الانجليز بكل شي

اما بالنسبه للحبيب وزير الداخليه
اتفق معاك انه في ناس تبيه اهو بالذات
ولا شنو نفسر هجوم الوطن عليه
لكن مايمنع هذا انه يكون الريال غلطان
انا اقولها .. غلطان ومليون غلطان
عيل منو يقول هذا الصبيح مو عراقي
عراقي اميه بالميه

واذا تم تجنيسه لازم يجنسون وايد ناس غيره .. شنو الي غير اهو .. لأنه شارك بالغز
في عشرات غيره !!!

ولا بس لأنه رفيج جابر الخالد

ومشكور على الوصفه السحريه مالت فطاير شويخ
هل مره لازم نجربها
معني وصفتي قريبه جدا منها :)

ويعطيك العافيه



Q8DOLL

شكرا شكرا .. احنا تلاميذج :)

واذا على السياسه .. فكله خواره .. لا داخليه ولا خارجيه

اما الاماكن الي رحتلها .. فانا طول عمري عيني على نفسي بارده .. عاجل يحليلي :P

Anonymous said...

المضحك نحن الفتيات نقول :
وين نعالتي !! والشباب : وين نعالي
فأنتم تقولين نعالي إنباق :)
وأنا أقول نعالتي انباقت :)

إستفسار : ( مالحقت بالفيديو على الألعاب نارية :) ؟ ) ..

مدونة رائعة من المدونات التي أداوم عليها :) .. أسعد الله أيامكم

Q80 Blogger said...

Cr8ivia

انباق انعالي يا ناس :)



Anonymous

شوف اهي من ناحيه مافيها مافيها

يعني شباب هل جم يوم صج ماكو شخصيه .. تقليد وبس .. لأي شي

غريبين




فتى الجبل

انا ما ذميته بكلامه .. بالعكس انا فرحان لأنه الريال صريح ومايخاف من اظهار عقيدته

والاسلاميين مالهم شغل .. يعني الحين البابا بالفاتيكان ما يؤمن بانه المسيحيين اهما الي بالجنه والباجي بالنار .. هذي عقيده .. تصرفات المسلمين مالها اي دخل

اشكره مره ثانيه على صراحته .. الصراحه الي يخاف منها كثير من المسلمين للأسف

يعطيك العافيه يا نهااااش



Eng_Q8

اهيا ديرتنا وفيها الي نبي :)

Q80 Blogger said...

الحارث بن همّام

ادري .. ذكريات نص الكويتيين مطبوعه بهل مكان :)



joy

آه صحيح .. مين ده ؟

محد عفسنا غير التجنيس .. صدقوني انعالي انباااااق :)



someone_q8

شكرا جزيلا

لكن لا اتفق معك في نقطه الوزير
انا سمعت وايد انتقادات للوزير ايام ماكان ماسك بالجيش
وعلى فكره صارت مشكله كبيره بين الجيش وبين امن الدولة

لأنه امن الدولة تملك سجلات سوداء لبعض المعينين في وزاره الدفاع .. وتم الابلاغ عنهم ولم يجدو اي تعاون

ومن بين هل اشخاص .. كان المجنس اليديد .. صاحب جابر الخالد .. الحبيب الصبيح

انا اقول لازم يفصلون اكثر ويدققون في اسماء المجنسين
فبعضهم عليه قيود امنيه
وهذا شي مخالف للقانون الي كسره وزير الداخليه

Q80 Blogger said...

esTeKaNa

انتي الي يزاج الله كل خير على الكلام الذهب الي كاتبته اهني
اتفق معاج إلى ابعد وابعد وابعد الحدود سواءّ كانت تلك الحدود بريه او بحريه

وفطاير شويخ .. ذكريات الماضي والحاضر واقولها باذن الله .. ايضا المستقبل :)

شكرا .. وسلميلي على الي ميتسماش :)




vancouver

لألأ .. اعوذ بالله
تو الناس :)
ماشبعت من الكويت .. عادي كندا نسحب اشويه على الدوام :)

وعلى قولتج .. صج شكوووووووووو .. مو عيدنا .. شكووووووووو ؟؟

وتعليقي على التصويت مؤجل

ولازم تجربين الفطاير .. تره شي لا يعوض :)



Najmah

من قال احلى شي فطاير شويخ
أحلى شي الكلام الي كاتبته

والله صح كلامج .. اتفق معاج

شكرا على المشاركه الجميله .. وياريت الناس تفهم بس

Q80 Blogger said...

شداخه

لوووووووووووول

الله يسلمج

والله تحليلج قوي قوي قوي
تعجبيني

انا قلت ضمير مستتر .. محد صدقني :)




نفسي عزيزه

سؤالج صعب
عطيني فتره افكر فيه :)

وفطاير شويخ تره بكل مكان .. مو بس اهني
هذي تحمل ذكريات ذهبيه :)

شكرا على المرور

Q80 Blogger said...

killie thiqqa

شكرا .. واسعد الله ايامج بعد :)

تحليل ممتاز .. لكن هل اختلف معاه

اعتقد بان الصحيح لدى الفريقين بان يقال انعالي انباق وخلااااااص :)

واما عن الاستفسار .. فسامحيني لم افهمه

وشكرا على المتابعه

Anonymous said...

لا أخينا الكريم لا يختلف بتاتا

وعن الإستفسار قصدت هل قمت بإلتقاط يوم من الأيام فيديو لألعاب نارية وودنا لو تضعها لنا :) ..

ودمت بخير :)

Q80 Blogger said...

killie thiqqa

لا والله
انا عندي تشبع من الالعاب الناريه من الصغر

لذلك .. في الوقت الحالي ما اتعب روحي وارفع راسي واشوف هل سوالف :)

عاد والله كنت متواجد في بيتنا الساعه 12 في رأس السنه
وبيتنا عند السفارة الامريكيه

وسمعت اصوات الجراقيات .. وكأننا في حرب خليج يديده .. بس حتى ما تعبت روحي وطليت من الدريشه :)

ودمتي سالمه :)

Selezya said...

:) انعالي انباقت
عاد انا اذا طلعت صح ولا غلط ماكو فرق عندي ماراح اصحح الجمله لو كنت غلط :)

اعتقد الحديث نفسه كافي للرد :)

الوزير يستاهل اللي بييله


وعلييك بالعافيه :)

Selezya said...

زين صج منو اللي باقهم؟