Saturday, August 18, 2007

هزه أرضيه في الكويت

آخر تحديث



تحديث ... 4:50 ص
مصادر من المسجد عند صلاة الفجر تقول بأن مصدر الهزه كان من منطقه السالميه وقد تمّ إخلاء بعض المباني هناك


وردت أخبار من مصادر متفرقه بحدوث هزه أرضيه في الكويت أو ما يسمى بزلزال عنونو ... وحسب المصادر تمّ ملاحظه الهزه في مناطق متفرقه منها : الفروانيه - القرين - مبارك الكبير - بيان - الجهراء وغيرها

انا الي ودي افهمه ... السالفه صارت قريب الساعه ثنتين ... انزين بدال ما نص الشباب الي قاعدين حزتها يدقون علي ... وانا ادق على ثلاث ارباع الي اعرفهم ... بس علشان ودي اعرف السالفه صج ولا اشاعه معني حسيت بشي غريب بالبيت ...


ليش مايكتبون بكونا مثلا الي اهي وكالة الانباء الكويتيه شي عن الي صار بدال مو حاطين عن عاصفه بتحوش الكاريبي وخليج المكسيك !!!ـ


ولا ليش ما يكتبون بالتلفزيون اي شي .. يعني يطمن الناس ... ماكو ولا شي بالتلفزيون غير الشريط الي بقناة فنون سوالف الناس عن الهزه الي صارت !!!

يعني لازم الموضوع يمر عليه 5 ساعات ومافوق عشان يفكرون يكتبون عنه ... يعني معقوله مافي مراسل ولا كاتب قاعد هل حزه !!!! وحس بالهزه مثل الناس

معقوله أكون الوحيد المتفرغ أكتب هل حزه ؟؟ ... انا اقول حق المحيلبي لو يمسكني كونا يكون افضل الصراحه

ثانيا عندي بعض الأسئله المتعلقه بهل موضوع:
ماهي علاقه مثلث الفساد بماحدث فجر يوم السبت؟
هل لمشروع الفحم المكلس دخل في التسبب بتحرك المسطحات من تحت أقدامنا؟
هل لحمله ترشيد يد في هذه الهزه؟
هل صحيح بأن الحكومه ستسقط القروض بعد تعرض المواطنين لهذه الهزه المخيفه؟


أعوذ بالله من غضب الله
على الرغم من أن الهزه كانت خفيفه بشكل كبير ولم يتم ملاحظتها من قبل الكثيرين ... لكنه وقت مناسب لتذكير الناس بعقاب الله ... فالزلازل هي شكل من أشكال العذاب والإبتلاء أعاذنا الله منها ... وحفظ الكويت وأهلها من كل مكروه ... آمين

روى الإمام أحمد من حديث أم سلمة رضي الله عنها قالت : سمعت رسول الله صلى الله عليه وسلم يقول : ( إذا ظهرت المعاصي في أمتي عمهم الله بعذاب من عنده ، فقلت يا رسول الله ، أما فيهم يومئذ أناس صالحون ؟ قال : بلى ، قلت : كيف يصنع بأولئك ؟ قال : يصيبهم ما أصاب الناس ، ثم يصيرون إلى مغفرة من الله ورضوان )ـ
قال الله تعالى : (( وَمَا أَصَابَكُمْ مِنْ مُصِيبَةٍ فَبِمَا كَسَبَتْ أَيْدِيكُمْ وَيَعْفُو عَنْ كَثِيرٍ))ـ

الابتعاد عن مايغضب الله يحفظنا ويحفظ بلادنا الحبيبه

4 comments:

Anonymous said...

الحكومة نايمه و الشعب نايم
و قلة من الشعب قد شعر بالهزة
ولكن الحكومة تستمر في سياسة التطنيش و ترقيعها ليسموها سياسة التطمين
اخاف يوم من الأيام اشوف الكويت الصبح محتلة من الهنود او المصاروة دون ان تعلن الحكومة
سمو الشيخ مدحت فرج و ولي عهده راجو متغالو خان
والرعية من الشعب انا و انت
بينما شسمهم...سوف يكونون إما بالطائف او سويسرا

Q80 Blogger said...

انا صراحه ماخذ احتياطاتي حق هل مواقف

الصبي الهندي الي عندنا كفيلي ... ضبطلك واحد من الحين

الشي الي يبط الجبد يا اخ عتيج انه احنا كويتيين ومتعودين على المصايب وسوالف حكومتنا ... الوافدين شنو ذنبهم
لازم اعلان تطميني على الاقل ... خصوصا بديره كل مكان محاوطينها نووي وصواريخ
الله يعينا

جنون إحساس said...

آنا حسيت فيها كنت قاعده وكلمت رفيجتي بالمسنجر بادرتني بقولها إنها تحس بإن الأشياء في دارها تتحرك

غريب إنه ما انذكر شي عنه بالأخبار
هذا تحذير وتنبيه من الله

عسى الله يرحمنا

Q80 Blogger said...

جنون إحساس

صح كلامج هذا تنبيه من رب العالمين ... غضب الله شي مو سهل

الله يستر ويحفظ ديرتنا