Wednesday, August 15, 2007

حجي الاسبوع

هل اسبوع ماكان في شي يديد بالجرايد ... كلشي متكرر

فراح تكون النشره هل اسبوع مصغره وان شاء الله تعجبكم


نشرة أهداف


سياسة خارجية :ـ

دفعة مردي والهوا شرقي ... وراها بيوم تم نفي هل خبر ومايندره اصلا وين منخش الحبيب ...



http://www.alwatan.com.kw/default.aspx?pageid=36&mgdid=532374


والله لو مو السندباد لو عبد الله البري والبحري ما يحلون الي بهل ديره ... الله يعينهم ولا يبلينا





بعدما نصبت غواصات روسيه علم بلادها المصنوع من التيتانيوم في قاع المحيط عند القطب الشمالي ... إحتدت المنافسه على هذه البقعه من الأرض والتي يعتقد العلماء بأنها تحتوي على 25% من النفط الموجود في العالم ... يتنافس على القطب الشمالي كل من روسيا وكندا والولايات المتحدة والدنمارك والنرويج ... وكل من هذه الدول يدعي سيادتها على قاع المحيط الغني بالبترول

مقال جميل أعجبني عن هذا الموضوع وتفصيل عن مستقبل القطب الشمالي قرأته في جريده الجريدة

إفتراح بسيط :ـ

ليش ماتسفّر الكويت كل البدون إلا تلك المنطقة لتحاول الدخول بالخط والمطالبه بحقها في قطبنا الشمالي !!!

رياضة :ـ




في بدليه بالعنوان ... للشباب مو للشاب ... بس الي سواه ازرق اليد شي مو عادي ... فازو على البرتغال ويوم الخميس عندهم مباراة بعد هزيمتهم من السويد امس ... مباراتهم الخميس سهله نوعا ما اما انغولا ... اذا فازو عليهم يتأهلون إلا الدور الثاني من بطولة كأس العالم للشباب

الشي الي يبط الجبد انه تلفزيون الكويت ماينقل انجازات منتخبنا ... ولاني عارف وين أتابع المباريات

لو كان منتخب القدم اهو الي داش بطوله كاس العالم جان قالبين الدنيا ... لكن الله يعينكم يا نجوم اليد ... وكلنا معاكم ونتابع انجازاتكم ... ان شاء الله إلا الأمام

إعلانات :Pp


هذا إعلان ناشرينه بجريده الوطن ... طبعا مادري عن شنو الاعلان ... من نوعيه هل جم سنه .. يحطون اعلانات بدون توضيح لين بعد جم اسبوع تطلع شركه ولا مجله

بس الشي الحلو اني اول يوم قلت طالع البدليه الي كاتبينها بالاعلان (حلات) بس اشوه عدلوها اليوم الي وراه :)ـ


طلابية :ـ

من يكسر هذا التحالف ؟؟؟ لا تعليق

لو تعلّم الكبار من الصغار ... لكان المجلس القادم حقهم ومقهم


مقالات أعجبتني :ـ
غداً يوم جديد! للكاتب د.خالد القحص ... يتكلم عن فلم من أحلى الافلام ... وايد يعجبني ... واستخلص منه بعض النقاط الجميله
عقر بقر يصيب أبواق الفتنة بالخرس لخالد الخالدي
مقالات مامنها فايده :ـ
كل مقالات نبيل الفضل ونواف الفزيع

8 comments:

Anonymous said...

جيرمي ريفكن .. جيرمي ريفكن .. هالاسم مو غريب علي !! ـ

بعد تمحيص وتقليب في الذاكرة طلع اهو ماغيره الي ثلاث ارباع محاضرات وافلام مادة الـ
Impact of technology on socity

كانت عنه وعن آراءه

اخذتها الصيفي الاول هالسنة .. ماانصح احد ياخذها اذا ناوي يظل صاحي ... شهرين والبروف يترس مخنا ترس بهالتناقضات والأسئلة الفلسفية عن مستقبل البشر على كوكب الارض

يعني موضوع الاحتباس الحراري الي تكلمت عنه في تدوينتك اليوم شي بسيط مقارنة بقضايا مثل الأغذية المعدلة وراثيا
او البني آدم المعدلين وراثيا او روبوتات المستقبل الي راح تقضي على كل الوظايف المتاحة للبشر او او او ...ـ

العالم مقبل على مصايب مالها اول ولا
آخر وانتوا بالكويت ماعندكم سالفة الا المظاهرات .. عسا ما منعوا كتاب دايخ سويتوا لنا مظاهرة وخبة :)ـ

Q80 Blogger said...

Anonymous

لووووول
يالله زين خلصت من الماده ... بس والله شي حلو تاخذ ماده عن هل مواضيع ... وكا اشحلاتك ليلحينك صاحي!!

خل العالم بصوب والكويت بصوب ... مشاكلنا اصلا اصعب من مشكله الاحتباس الحراري وثقب الاووزون

Q8DOLL said...

بوستك وايد وايد مهم
مع انك تقول الاخبار اللي نقلتها من الجرايد مافيها شي يديد
بس ادراجك لأكثر من موضوع وايد حلوو

تصدق من كثر ما اسمع اخبار عن مقتدى وأخبار العراق ماقامت تفرق الأخبار عندي
لأنه كلهم مكررين اذا مواليوم تلاقي بعد اسبوع نفس التصريح


وسالفة كندا وروسيا والدنمارك وأمريكا
"طبعا أمريكا لها حسبه بكل شي لازم
عصعصها يطلع لنا"
ذكرتني بمقوله المثل اللي مادري من وين
تهاوشوا القطاوه على سبت حلاوه
والمقاله حلوه خصوصا انه ناقش موضوع
ذوبان الجليد القطبي وهو اللي جعل التنقيب عن الوقود ممكن
وهو استفاده لهالقطاوه
وبنفس الوقت نقمه على كوكبنا
لأن راح يأدي الى كوارث الله يستر علينا منها
تظن يطلع لنا شي بالحسبه ؟؟

والله ياخوي انا ما اهتم بالرياضه ذاك قبل ايام الواحد كان يشوف شي يرد الروح
ليمن أحبطني منتخب القدم وخلاني اكره الكره كلها أيا كانت
لكن
فعلا سالفة اليد والا السله
لكن اليد أقوى طبعا
المهم
محد مهتم فيهم
ومو بس أهما
ترى في وايد بطولات ورياضيين يستحقون الاهتمام الاعلامي
أكثر من اهتمامهم حق نجوم ستار أكاديمي

على فكره هم كنت اتابع كرة اليد سابقا
وكنت اذكر من اللاعبين عيلا عبدالقدوس وبعاس مراد
واذا كنت غلطانه استر على ما وايهت زين مني ذكرتهم

وبالنسبه للإعلان
عندي تعليق واحد
"حلات الويه"
هههههههه


وبسك تصيد بدليات ترى انا ماخذه جائزه المركز الأول بالتبدل

لو تعلّم الكبار من الصغار
صح لسانك
لكن المشكله اذا الصغار كاروا كبااار
هل راح يظلون على أفكارهم والا الكرسي يغير حتى الأخلاق؟؟

بانلسبه للمقالات اللي عاجبتك
عيوني زغللت
وانشالله لي عوده واقراهم
تحياتي لك
وآسفه وايد عاللإطاله

حلم جميل بوطن أفضل said...

Groundhog Day من الأفلام الظريفة الكوميدية ذات الحس الإنساني. قد يكون هذا الفيلم الوحيد الجميل للمثل بيل موري الذي لا أستسيغه

طلعت عيل من ربع تشلسي .. ميخالف كلش و لا ملاقة أليكس فيرغسون

Q80 Blogger said...

Q8DOLL
يعطيج العافيه الصراحه على المتابعه الحلوه والكلام الأحلى

اول شي عن سالفه العراق ... اي والله على قولتج ملينا واحنا نسمع اخبارهم وحالتهم من سيء لي أسوء ... الله يعينهم بس

وسالفه القطب الشمالي ... عاد هذي مو أي حلاوة .. حلااااااااااااوة عووووده
واشوه اعجبتج المقاله ... لأنها صج تستحق القراءه ... تتناول الجانبين الايجابي والسلبي من ارتفاع درجه الحراره بالارض ... معني شايف الجانبين سلبيين ... يعني حتى لو ذوبان الثلج راح يخلي الناس توصل حق النفط ... بس المشكله منو من الناس راح ياخذ هل نفط .... وعلى قولتج تهاوشوو القطاوه

وعلى سالفه الرياضه ... اشلون تقولين ماتعرفين ... كا اذا لاعبين اليد تعرفينهم ... صج غلطتي بالاسم الاول ... بس كافي مرااد وعبد القدوس ... طلعتي خبره

واتوقع مثل ماتقولين ... الصغير اذا كبر .. غرته الدنيا ... الله يعين

وانا الي آسف على الإطاله :)

Q80 Blogger said...

حلم جميل بوطن أفضل

انا ودي اصير معاك ... بس مشكلتي اكره اللون الاحمر ... :)

Q8DOLL said...

Q8i_Blogger
أخوي
لما رديت عشان اقرا المقالات اللي أشرت لها في البوست شفت بدلياتي والله احس لو مو معلقه ابرك
انا اقصد عباس مراد وعيال عبدالقدوس
""اللي منهم لقبه الثعلب""
شلون طلعت جذي مادري ؟؟
ترجمها من الأهوازي الى العربي
ترى بس اختلاف لهجات
:)
فعلا خبره بالكره بس قلت لك ايام المراهقه لما كانت الكره تحجي
الحين والله مالي مقاقه اطالعهم يضيق خلقي
انا اقصد القدم
واقولك سر ؟؟
سبب تحويل اهتمامي لكرة السله واليد هو طيحت حظ منتخب كرة القدم
فرب ضارة نافعه
وتحمل بدلياتي ترى ماخذه جائزه عليهم
-------
المقاله الأولى رائعه وتلامس حياة كل شخص فينا
منو فينا حياتنا غير روتينيه الا المحظوظ فقط
لكن لو فكرنا شوي بيدنا ان نغير يومياتنا لو مرتين بالاسبوع
ونحسن من سلبياتنا في ان ما نكررها
الانسان فعلا لازم يشوف كل يوم بأنه يوم جديد وما ينسى ان البني آدم يعيش مره وحده بس واللحظه اللي تروح ماراح ترجع مره ثانيه فتنحسب من عمرنا

بالنسبه لعقر بقر

رأيي مع احترامي للجميع
أرى ايران خطر على منطقتنا وقمبله موقوته واستغرب من الذين يصفقون ويؤيدون الدوله الفارسيه صاحبة الخليج الفارسي اللي مادري وينه بخريطتنا لايكون قصدهم بس خليجنا ماغيره ؟؟

أحسنت الاختيار

Q80 Blogger said...

Q8DOLL

لوووول
عادي تصير بكل العالم .. اولهم انا ... البدليات شي لايمكن الاستغناء عنه بالكويت ... فهي تعطي نكهه للحجي :)

ولا تخافين علقي ولا يهمج ... اطوف بدليات انا ... بس بدليات الجرايد ما اقدر امسك روحي

اشوه انه المقالات نالت اعجابج
هذا يدل انه بينا عامل مشترك :Pp

وعلى سالفه خليج فارس ... هذا بروحه يبيله بوست كامل

الي مستغرب منه انه بطرفين الخليج عرب ... يعني تاريخيا بر فارس كانو ساكنينه عرب وطبعا بر شبه الجزيره اصل العرب
يعني الفرس وينهم بالموضوع ؟؟؟؟
الفرس كانو بالجبال صوب شيراز ومادري وين
اما البحر الي اهو الخليج .. فهو عربي بحت

وشكرا على المتابعه الجميله