Saturday, November 24, 2007

المؤتمر ونتائج الإنتخابات

بعد سفرة استغرقت 14 ساعة إستقرت بنا الطائرة في مطار لوس أنجلوس في ولاية كاليفورنيا
السفره ستكون قصيره لحضور فعاليات المؤتمر السنوي لطلبة أمريكا

المشكلة هذي السنه انه المؤتمر حاطين بمكان وايد عجيب
يعني المؤتمر الي طاف كان بنيويورك .. وبالنسبة لي نيويورك ما كانت شي يديد
أما السنه هذي فأول مره اطب كاليفورنيا

الفندق موقعه في أكشخ مناطق لوس أنجلوس وهي منطقة بيفرلي هلز
BEVERLY HILLS
المنطقة هذي مشهوره بسكانها الي من طبقة عالية وأكثر سكانها أبطال هوليوود

طبعاّ أنا ما تذكرت إنّ هوليوود قريبه يم فندق المؤتمر إلا بعد الوصول

كل المقدمة الي كتبتها والمدح بالمكان الي رايحله بس حتى أبرر لنفسي أول شي وللجميع بعد عدم تغطيتس للمؤتمر والانتخابات بشكل تفصيلي أكثر

يعني بإختصار شديد .. الديره الي مسوين فيها المؤتمر صكت على فعاليات المؤتمر

لكن في شي وحيد ما طوفته .. العزايم .. لأني صراحه من زمان مو ماكل عيوش وأكل مثل الأوادم




التغطية



نص الندوات ماحضرتها الصراحه

حضرت المهرجان الخطابي للقوائم

ماكان في شي يديد

نفس الحجي كل سنه .. اللهم هل سنه صار في اشويه شد على موضوع المناظرة الي كتبت عنها من قبل

اليوم الثاني

الشي الوحيد الي حسيت انه مفيد أهو الندوة الرياضية
وهم للأسف ماحضرت غير نهايتها

بس واضح .. التركيز كان بس في إنتقاد طلال الفهد وبس

الندوة كانت من قبل المذيع خالد الحربان والنائب محمد الصقر

طبعا أنا مو فاهم إشلون محمد الصقر ينتقد الرياضة واهو كان واحد من أفشل الرياضيين .. والي وصّل نادي الكويت إلى أسوء حالاته في التاريخ

على العموم .. ماكو حلول .. إنتقادات بس

السنه الي طافت كانت الندوه من مرزوق الغانم .. وتحجى وقال وبشرنا بالقوانين الرياضية اليديده
للأسف .. وأنا أدري الخطأ مو من المجلس .. بس حالنا باختصار من أسوء إلا أسوء

وهم راح نحضر السنة الياية الندوة الرياضية إذا الله أراد .. وراح نسمع نفس الحجي ولا أكو أي تطور .. للأسف أغلب الكويت مو نافعين غير بالحجي .. الديره ما قاعد تاخذ خطوه لي جدام بأي مجال كان


وأخيراّ بعد الإنتهاء من الإنتخابات تم الإعلان عن النتايج .. وعن فوز قائمة الوحدة

طبعا الحضور فاق ال700 طالب .. شبعت من الكويتيين .. يقولون أكبر تجمع كويتي خارج الكويت .. ويمكن يكون حتى أكبر من مؤتمر جده

طبعا لازم الأشكال الغريبه العجيبه
بس هل أشكال يبيلهم بوست كامل ..
مو فاضيلهم .. وراي باجر فرااره بهل ديره .. غير الندوه السياسيه الي إن شاء الله راح أكتب عنها الأيام اليايه

ألحين بخلي الصور والفيديوات تتكلم

أول شي تصوير لحظه إعلان نتائج الانتخابات






بما أني ما أصوت باعتباري طالب في كندا .. إستغليت الفرصه واستفدت من كل قائمة بطريقتي الخاصه :) .. يعني ماخليت فنيلا على دفتر .. ماقول غير .. يعطيكم العافيه شباب






صورة من بلكونه الفندق .. صراحه اختيار جيد




آخر شي .. مشتاق حق النخل .. بس نخلهم اهني وايد وايد طوال .. وعلى الفاضي .. مايطلعون شي .. نخل امريكي مامنه فايده .. طول عمرنا أحسن منهم حتى بالنخل :)





شي ماله شغل
أنا سمعت عن حداق بالديره .. عن قناص .. عن حتى تقنبر
بس أول مره أسمع عن صيد بط بالكويت !! شوفوا الفيديو




12 comments:

AnGlOpHiL said...

جد والله تروح المؤتمر؟


الكون حواليك و تروح المؤتمر...ليش عرس باريس هلتون؟



استمتع يا فتى...و دعك من الأشكال الغريبه العجيبه :D


ربي يسلمك

على نفسها جنت براقش said...

اجرام هذى الطيور مهاجره و الكويت محطة استراحه مهمه لهم

احتمال يكون بينها انواع مهددة بالانقراض

و قاصر عليهم لحم بالديره

احتريت
:(

Q8i_Blogger said...

AnGlOpHiL

لا في وايد أشياء حلوه بالمؤتمر .. خصوصا العزايم :)

الله يسلمك .. ويعطيك العافيه على التعليق



على نفسها جنت براقش

يعني الله يهداج بس يا براقش

يعني انا قلت صيد بط بالكويت .. اكيد يعني لا تفكير ولا شي
اخاف صج هامهم مهاجره ولا حتى بدون
المهم يستانسون
ووناستهم جذي

ماتشوفين الفرق بين بر قبل .. وبرنا الحين .. كل من نفس المشكله

الله يعين .. ولاتحرين نفسج وايد .. تره ماخفي كان أعظم :)

loyalty said...

استمتع !!

استمتع بالمؤتمر , و بغير المؤتمر .. فرغم غربتك يظل دائماً هناك جانباً جميلاً للأمر :)


بالتوفيق

فتى الجبل said...

يعطيك العافية على التغطية
بس منو فاز؟
واذا تبي بط روح بوبيان فيها كل شي بس ما يدخلون الا العسكريين

سدرة العشـــاق said...

أهم شي العزايم ...

عليك بالعافية

:)

esTeKaNa said...

يمه اسم الله على ولدنا
كسرت خاطري
متعني عشان العزايم؟
:))
ايييه ذكرتني بواحد كله يعيب على اكل امه ويوم سافر يدرس يقول حق امه اخييييه بس اخيه
ليت حكوكه الجدر بس توصلني وانا راضي
:)



شكرا على تغطية المؤتمر
اعشق لحظة اعلان النتائج
واهم شي انك استفدت وهذا المطلوب..ما خليت دفتر ولا تي شيرت؟
اي زين تسوي يفيدونك
:))

mtfa2el said...

شكل العزايم صكت على المصقعة !!
هذول ربعنا ما يتغيرون
تحلطم بكل مكان و بالنهاية ولا شي

كمل كمل نبي تحليلاتك عن الوضع

Anonymous said...

يمعود زين تسوى تغير جو وتتنشط قبل المذبحة الكبرى بعد جم يوم:P

Q8i_Blogger said...

loyalty

أجمعين يا رب
وصح كلامج .. لكل شيء متعه خاصه
بس لازم نشوف الجزء المليان من الكوب .. مو الجزء الفاضي منه



فتى الجبل

الي فازو اهما الوحدة .. الي يمثلون الفكر الليبرالي
واهما الوحيدين الي من هل تيار الي صامدين على الساحه لي يومنا هذا :)
اما بالنسبه لبوبيان .. فمالك شغل .. عندي واسطه عسكريه قويه
بس ماعرف اقنص
تيي معاي ؟
:)

Q8i_Blogger said...

سدرة العشـــاق

اي والله .. صح السانج
البلاش .. كثر منه :)
والله يعافيج ويسلمج



esTeKaNa

اي اي .. شفتي اشلون .. طول عمري اكسر الخاطر

واذا على الاكل .. مو بس أكل الوالده
حتى مطاعم الهنود نتحلم بريحتهم اهني
خليها على الله بس

اما بالنسبه للدفاتر
لاتوصين حريص
اعرف اشلون استفيد منهم هل قوائم انا :)

Q8i_Blogger said...

mtfa2el

تامر أمر

بس عيب تقولها
ماكو على المصقعه .. افا عليك بس .. شغل ايديا وحياة عنيا :)


Anonymous

لوووووول
اشدراك عن المجزره؟
لا حطلك نك نيم .. عشان نصيدك المره اليايه :)