Monday, November 19, 2007

تربيتنا وسياستنا

تربيتنا



بما اني من الطلبة الي درسوا على يد أساتذه رجال في المرحلة الإبتدائيه .. فلا أستطيع الحكم على مدارسنا الإبتدائيه في الوقت الحالي .. بعدما تم تحويلها إلى مدارس ذات قيادة نسائيه

بس قبل جم يوم كنت أطالع البرنامج التراثي ماما أنيسه .. شفت هذي اللقطة وإستغربت كثيرا

يعني انا مو فاهم .. يهال أعمارهم على 7 و 8 سنين .. قاعد يرقصون جذي ليش؟

لا والي يشوف شنو لابسين .. هههههههه

الله يعينا على الجيل الصاعد


يعني مايصير نخلي كل شي بايد المدرسات .. المفروض في مناهج معينه وقواعد مايصير تجاوزها






هذا خبر عن ثانويتي قبل .. صراحة شي حلو .. احنا لا كان عندنا انتخابات ولا هم يحزنون .. دكتاتوريه غير طبيعيه

حلو نشوف كلام جذي من طلبة بالثانويه .. بس المشكلة نفس قوائم الجامعه نلقاها بالثانويات .. مشكلة

*

*


سياستنا



شي ثاني غريب

60 مليون للعراق
150 مليون دعم لبحوث الطاقة


أستغرب هل أرقام تطلع في الوقت الي الكل يطالب فيه بكادر خاص واسقاط القروض وزيادة المعاشات
يعني ألحين حتى الي كانو معارضين قبل .. بيقولون اشمعنه العراق
ليش منظمه مادري شنو تاخذ واحنا لأ

ادري هل تفكير خاطئ .. بس الناس الحين جذي تفكر .. فليش نزيد الطين بله؟


غريبه سياستنا

*

*



هذي الصوره إهداء حق اخوي rwatan

بس عشان أبينله شنو قيمة الرهش
فهو لا يفراقني حتى في ترحالي

هذي صورة الرهش الي قضينا على نصه .. ولا تحاتون فيه غيره .. الصوره من بلكونة الشقة






أخيرا هذا الشعر إهداء لك زوار مدونتي الأعزاء .. تستاهلون أكثر :)





33 comments:

Anonymous said...

Great capture:)

حمودي said...

صح كلامك عن الرقص صراحه يفشل يعني سوو استعراض غير هذا مو اله صيني مادري ياباني


ومشكور على الاهداء بس لا تعيدها
:)

rwatan said...

ليش يعني.... تبي تجرح مشاعري؟ تاكل رهش أوكي معقول. لكن تسافر و تاخذه وياك!!؟ :) هذي سابقه في عشق الرهش ما مرت علي
و عموما الإهداء مقبول منك و شكرا جزيلا :) رغم إني ما راح أجيس الرهش بـــتـــاتـــا :D

فتى الجبل said...

الرهش بدون خبز ايراني ما يسوى شي
تبي أدز لك خبز ايراني بال دي اتش ال؟

Q8i_Blogger said...

Anonymous

:) Thanx


حمودي

خلاص ما عيدها :)

لا بس السالفه مو بس الرقصه .. انت شوف شنو لابسين
وحركاتهم مع هذي شسمونها .. المهفه
هذي رقص حق البنات بديرتهم الي اهي اليابان مادري الصين
يعني خل يحطونهم مثلا يلعبون كاراتيه .. اذا صج متحطمين بهل دول
مو رقص بنات حق رجال المستقبل هههه :)

Q8i_Blogger said...

rwatan

افاا ليش عاد ماتجيسه .. تره هذا يسمونه أكل الروح
من غيره ماكو روووح
:)

تره انا مصورلك بس واحد .. في منه وايد

بس انا عطيتك هل اهداء .. لأنك في بوستك جرحت مشاعري

فوحده بوحده :)




فتى الجبل

والله يا اخي انت الي فاهمني
اكوووون لك شاكر وممنون .. بس تكفه .. حتى لو خبزه وحده .. اقزرها اسبوع عليها عادي :)

Ealaf said...

الله يكون في عون أجيالنا !

محزن جدًا الفيديو .!

سدرة العشـــاق said...

لووووول الرقصة عجيبة

ذكرتني لما كنت بالروضة كان معاي واحد اسمه رامي .... شوف المخامط لووول اللي تعطيه كاكاو و اللي شيبس بس اللي أول مرة يشوفه على باله بنية

--------

الرهش آه على الرهش
ذوقك بالأكل خطيــــــــــر
صج يبيله خبز ايراني حار والله لو أتريق و أتغدا و أتعشى فيه ماعندي مانع

--------

يعطيك العافية

:)

Q8i_Blogger said...

Ealaf

صج محزن .. الله المستعان



سدرة العشـــاق

لووووووول
رامي عاد
وين الروضه .. بالسالميه ؟

لاتذكريني .. لا اتييبين طاري الايراني :)

ezain_kilah said...

لوووووووووووول شبدي؟ ...شخلي؟... اليهال اللي جنهم يابانيين من المكسيك ولا الطلبة اللي يبون يقللون اسعار المقصف ولا الشعر اللي اهديتنا إياه؟ ...أخييييييييييييييييييييه على الشعر اللي أهديتنا إياه

أقول...شوية رهش ما عليك امر

mtfa2el said...

بييي شنو بيخلون عيالنا بنات غصب ؟؟؟
ناقص يحطولهم حمرة و كحل و يقولون غناوي فلونة !!!
----
الشاعر السوداني شاعر و لا كل الشعرا
يصك على شاعر المليون و جنه الورد

العرزاله said...

تعب قلبي يترجى..

رجوعك..من على الدوار..

سالم سيار الخرطوم لول

نايس بوست بروذر

Selezya said...

لووووووووووووووول حرام عليك شهالاهداء
يعني المشكله مو قادره اثبت ويا الكلام الدلع بالصوت وايد اغراني
بطلنا مانبي اهداءات بليز :)

--
اليهال خلاص انساهم راح المستقبل اللي كنا شادين الظهر فيه

عموما
عليك بالعافيه بالرهش

Q8i_Blogger said...

ezain_kilah

هههه .. اهم شي صينيين من المكسيك
الشعر تره متعوب عليه

اي والحين انتي بالكويت .. وناطره مني انا المسكين قطعه رهش من اهني
:)



mtfa2el

واشدراك ماسووها ؟
انا هذا الي شفت .. اما الخافي اعظم
عادي فول ميك اب تره :)

اما بخصوص الشاعر .. بذمتك ما يذكرك بايليا بو ماضي
المفروض موضوعك الياي بالبلوق عن هذا الشاعر الجبار :)

Q8i_Blogger said...

العرزاله

نايس مروور يا الحبيب
شكله وايد يازلك الشعر الخرطومي
انا صارلي يومين اسمع ابداعاتهم .. شي غير طبيعي :)



Selezya

ههههه
الشاعر عين جاريه من الاحساس .. فلا تلومين شاعرنا اذا اندمج بالشعر اشوي
يعطيه العافيه على هل ابداع الصراحه :)

والله يعافيج :)

Q8 Disaster said...

الحين عرفت السر من وراء اجيالنا التروفه

ياخي والله فرق بين جيلنا وجيل الي قبلنا والجيل ال2000

وتقولون شنو سبب ضاهره الترف والجنس الثالث

اذا المدرسه تعلمهم رقص الحريم هذا تبون يعني واحد فيهم يطلع مثل عنتر برجولته
مااعتقد الا اذا كان وراه ابو وام يعرفون اشلون يربونه مو الاب والام الي يعتمدون على الخدامات

انا من طلع هالقرار مال تأنيث الابتدائي وانا مو عاجبني كلش

مااقول الا الله يستر على عيالنا
-----
سالفة التبرعات ياخوي تعودنا عليها
والمفروض الاقربون اولى بالمعروف
بس مانقول الا الحكومه ابخص

----
يعجبني فيك حبك للتراث
ذكرتني بمحاضره طلب منا الدكتور كل واحد يتكلم عن بلده واييب اكله من بلده احنا بما ان مانعرف الا طباخ الهمبرغر وصينا الاهل يدزولنا درابيل واغريبه , دكتورنا اماراتي قزرها عالدرابيل يقول قبل كنا نروح الكويت وانيب معانا درابيل لووول
------
لووووووووووووووووووووووووووووووووول ياقلبي يالاحساس والمشاعر
بس جني سامع هالشعر يغنيه محمد عبده :P

Q8i_Blogger said...

Q8 Disaster

هذا يا خوي الي شفناه .. وماخفي كان أعظم .. مايندره شيعلمونهم كل يوم الصراحه
ومثل ماقلت الله يستر على عيالنا
الحين ماندري وين نوديهم
اول نقول المدارس الاجنبيه تطلع تروفه
الحين مدارس الحكومه اخس


على رايك .. الحكومه ابخص :)


هههه .. لا تراث ولا هم يحزنون .. بس الرهش شي ماينعاف .. خصوصا مثل ماقالو الشباب .. مع خبرز ايراني حار :)

احتمال عبده
انا سامع انه اكثر من مغني وده ياخذه
على العموم القرار الاول والاخير يعود حق ابو المشاعر .. شاعرنا العظيم :)

سدرة العشـــاق said...

لاوالله كنت بروضة مشرف بس امه كويتية يحليله رامي .... انا بعد بارع كل ربعي كنوا صبيان لوول
بس اشوا ما صرت صبيك سملله علي

Q8i_Blogger said...

سدرة العشـــاق

ههههه
على الاقل انتي بس بالروضه متأثره بالصبيان

هذيل الي لي الابتدائي كل واحد اشكبره .. ليلحين يرقص رقصات بنات
هذيل اشلون راح يطلعون

عاد انا كنت بمشرف بعد
مادري اي روضه طبعا
شاهين شي جذي :)

على نفسها جنت براقش said...

اهم شى عشقى الاول و الاخير رهش
:)

乂♥Not.ViRGo♥乂 said...

هههههههههه خووش اهداء
رومانسي حدك :)


والله يستر من الجيل القادم
اتوقع كله نساء ..!!!

Q8i_Blogger said...

على نفسها جنت براقش

تحياتي حق الذوق القوي :)



乂♥Not.ViRGo♥乂

طول عمري فيني حس رومانسي قوي
والاهداء هم حق نساء المستقبل بعد :)

Suki_Candy said...

awal shay bel yahal 9ij 9ij yath7kooon

وبعدين سالفه الرهش واي لذيذ وثاني شي

الشعر يهبل

صح لسانك يابلوجر

Mishari said...

اول شي عاش الرهش وراعية :)

ثاني شى شكلهم بيطلعون جيل مايع

لان يا اخي بدال ما يسون اصدقاء شرطة واشبال ومخيمات
يخلونهم جذى

ما اقول الا سلامات
واكل الرهش واستمتع

Q8i_Blogger said...

Mishari

عاش من كتب :)

وانا ما قول غير سلملي على الاشبال والله


تحياتي يا الحبيب

Aldenya said...

اهداء عجييييب

:>

ميرسي :p~


والرقصه تعبر عن مستقبل الجيل القادم


للأسف

:/

5roofa said...

شوف على المدرسات الحين لوول لو يناقزون ما يقدرون يسون الي مدرساتنا ايام الروضه يقدرون يسونها

لانه امبي الصبيان الحين يخرعون تخيل عندي رفيجتي مدرسه صبيان كل يوم لازم طاعنين بعض بالاقلام
ولا حاذفينها بكتاب تكرم جوتي
يعني الحين لو شنو ما تقدر تغير المدرسه من شي

و لو يردون نظام المدرسين جان يمكن تعدل الوضع لانه الريايل يقدرون على الصبيان اكثر من الحريم

thanks 3ala el sweet comment lool...
o zen awal mara takteb shay agdar ared 3ali
swalfek kelaha seyasa fe seyaya
:D

و الرهش ما احبه لا تحطه مره ثانيه لو سمحت
لوووووووووووول شرايك و انا عصبيه
;p

la ambi post raw3aa

yeslmooo

salamz friend...

esTeKaNa said...

مو القياده النسائيه بالمدرسه اهي اللي دودهت الصبيان
تلقه صبي يقول امبييييييييه
واااااي
قطيعه
@@
واهم اللي خلو عزيز وعبود يفكرون بجريمه اغتيال الجنس الآخر
:))
بس السؤال اللي يطرح نفسه
ليش قاعد تطالع ماما انيسه؟
:Pp~

بعثرة مشاعر said...

بالعكس

تأنيث المدارس ماجاء من عبث لكن كانت له دراسه و بحوث قبل ماتتم عملية التأنيث

له فوايد و مميزات أكثر
و طبعا لابد من العيوب لكن المميزات تطغى

و يالفة ماما أنيسه فهذي ولت أيامها و راحت
و كان مقصوص علينا فيها
على الرغم من اني احب شخصيتها لكن البرنامج ككل فاشل من أوله لي آخره

ماغير اليهال يرقصون و يغنون
و لا خساير حق الدروع و الورود من الأهالي

يعني ماكو استفادة بالمره


يعطيك العافيه عالبوست :)

عثماني said...

الله يعينا على الجيل الجديد

جيل متنيل متنيل بستن نيلة

الله يستر


رهش العافية ان شاء الله

:)

Q8i_Blogger said...

Aldenya

ولكم

وتوقعي كل شي من الجيل الصاعد :)



5roofa

اهلا اهلا بخرووفه
حمدلله على السلامه اول شي

بعدين اذا اليهال يطقون بعض باقلام ومادري شنو .. احسن من انهم يرقصون مثل البنات
خل يتذابحون ولا يطلعلنا جيل كله تروفه الصراحه
وعلى قولتج
الرياييل يعرفونلهم اكثر
بس في ميزه بالابلات
الابلات يشتغلون من قلب ويتعبون على شغلهم
اما الرياييل .. كلشي على الماشي
لما اشوف جيل هل جم يوم والاهتمام الي يحصلونه .. اتحسر على ايام مدرسينا
بس هم الحمد لله ولا نرقص جذي :)

وثاني شي .. شوفي انا مستعد اني ما اتكلم بالسياسه مره ثانيه
بس على شرط
تقولين تاكلين رهش لمده اسبووووع على الريوق
مع خبز ايراني
وصدقيني ماراح تتحسفين

ولا تقاطعين :)

Q8i_Blogger said...

esTeKaNa

والله مادري الغلط من وين
بس الي أعرفه .. لازم يكون في اشويه رقابه على الي يسوونه الابلات

اما برنامج ماما انيسه .. فانا اقولج ليش اشوفه

الله يسلمج .. عندنا اهني ماتطلع غير قناة الكويت
والقنوات الحكوميه
يعني لا اكو راي ولا اكو وطن ولا ام بي سي .. ولا غيرووو
فلذلك 24 ساعه الكويت
محد يشوف تلفزيون الكويت كثري
ههههههه
ومع فرق التوقيت
يكون برنامج ماما انيسه في وقت السهره
اصلا من كثر ما اشوف .. صار عندي خبره .. اعرف نص الروضات الي بالكويت :)


بعثرة مشاعر

صح كلامج
انا ما اختلف في فوايد وايد من التأنيث .. خصوصا وانه الابلات من طبعهم الاهتمام بشغلهم مو مثل المدرسين المهملين
انا شايف الفرق .. ما كنا نحصل نفس الرعايه قبل احنا .. ايام المدرسين
بس هم في نقطه
لازم يكون في رقابه
مانبي جيل متأثر بالنساء اكثر من اي شي ثاني
مو ناقصين اشكال جذي بالديره
يعني بالفيديو مثلا
اعمارهم على 8 و9 سنين لابسين لبس مادري اشلون .. ويرقصون مع المهفه هذي .. رقصه بنااات مايبيله حجي
اشلون يخلونهم يسوون جذي؟

اما بالنسبه حق برنامج ماما انيسه
انا اتفق انه مصاريف زايده
بس تره الاهالي مستانسين
يعني الهدف بس يشوفون عيالهم بالتلفزيون .. فعشان جذي يدزون ورد وغيره
على العموم .. اذا لغو هل برنامج .. تلفزيون الكويت شنو يحطون
ماعندهم برامج
هذا البرنامج الي مخلي الناس تفر على قناتهم الدايخه

الله يعافيج .. تحياتي

Q8i_Blogger said...

عثماني

الله يعافيك اخوي

وانا اقول مو بستين نيله ... بمليون نيله

الله يستر :)