Sunday, December 09, 2007

تخلّف مجلسنا الموقر

طوال الوقت ونحن نسمع الإنتقاد للحكومة من الجميع .. فالحكومة هي وراء تردي أوضاع البلاد في جميع المجلات

لكن هل لنا اليوم أن نتكلم عن مجلسنا الموقر؟

لن أضع رأيي بالمجلس .. بل فقط سأعرض بعض المواقف الحديثة الكافيه لإثبات هذا التخلف المزروع في مجلسنا

الخبر : تمكن النواب من إقرار زيادة العلاوة الاجتماعية بواقع 50 دينارا للموظفين والمتقاعدين الكويتيين في القطاعين الحكومي والخاص وذلك لمن لا تزيد رواتبهم على 1750 ديناراّ

السؤال الكبير: شنو كان تفكير مجلسنا وهو يقر هذه الزيادة؟

التفكير واحد من جميع أعضائنا .. المصالح الإنتخابية
فلا تفكير من ناحية اقتصاديه ولا من ناحية العدالة بل فقط لمصالح شخصية انتخابية

الزيادة باختصار جاءت تقريبا باجماع النواب لانقاذ انفسهم من ضغط الشارع وايضا لتغطيه مواقف بعضهم وخسارت بعضهم الآخر في حرب اسقاط القروض

لكن مجلسنا لا يعلم بأنه لم يخدع الشارع .. بل خدع نفسه بهذا القانون

فالقانون ردّ إلا المجلس وهذا ماكان متوقعاّ، فقد كانت خطة الحكومة هي وضع دراسة شاملة وكاملة لكل الكوادر والمعاشات وتقديمها في فبراير، فما الهدف من الزيادة في هذا الوقت؟
أم هي فقط خطط انتخابيه سخيفه

لنرجع إلا القانون .. يقول القانون لكل شخص معاشه أقل من 1750 الحق في الحصول على الزيادة

لنفرض .. موظفان يعملان بنفس الإدارة .. أحدهم أقدم من الآخر في الإدارة وقد حصل على كل العلاوات الممكنه ومعاشه الحالي 1800 دينار
أما الآخر فهو أقل منه في العلاوات والمركز ويحصل على 1700 دينار
بعد الزيادة العبقرية
سيكون معاش الأول 1800 دينار .. أما الآخر فسيصبح معاشه 1750
بعد فتره حصل الثاني على العلاوة الأخيرة التي كانت تنقصه
وأصبح الشخصان بنفس المرتبه
لكن معاش الأول سيظل 1800 دينار .. أما الآخر فسيرتفع معاشه إلا 1850 دينار
أين العدالة في ذلك ؟؟؟

غريبه تلك القرارات المتخلفة .. التي لا تستند على أي فكر إقتصادي ..

*
*

منوعات من مجلسنا المتخلف

1
شوفوا الفكر الراقي من بعض نوابنا
يعني اعتراف صريح واشكره بمخالفه القانون وتحويل الأصوات
هذيل للأسف الأشكال الي انوصلهم مجلسنا



2
بعض كلمات السيد القلاف .. الي ليلحين مانسى المجلس .. وليلحين يحلم بريحته
يقول الأخ امس في جريدة السياسة

"وباضافة جديدة تماديا للمخالفة الشرعية السابقة وهي تحالف في وضح النهار بين السيد الرمز والأخ جمال الكندري ممثل الحركة الدستورية"

يا سلام على الفكر الراقي من نائب سابق دخل المجلس في ثلاث دورات متتالية


أتمنى بس الناس تسمع وتشوف .. وماينقص عليها بقوانين دايخه ما منها فايده غير اهلاك ميزانيه الدول على اي شي

تره بيدنا انغير هل مجلس

في النهاية
1
باقر المسكين .. أشكره على موقفه القوي
2
SALAM FM .. فكرة جميلة واتمنى لها التوفيق

19 comments:

Selezya said...

اكيد بيدنا نغير هالمجلس
لكن شالفايده اذا طول هالسنين ندري بخرابه وعادي نرد وندخلهم
رياييل شكبرهم شعرضهم وبهالمستوى وعلبونه شهادات عندهم طل كلها تزوير
ترا والله حرام مخلينهم وساكتين
لعبوا بحسبة الكويت ماخلو شي
--
انا عادي عندي اييب قنبله وادش داخل وافجرها وانا وياهم مو مشكله اهم شي كلهم ينقرضون
اخاف صج
لوول
بايعه عمري
لالا صج عادي عشان الكويت مو مشكله
:)

فتى الجبل said...

الكل يحسدنا على هالنواب
اللي خلوا الحرامي شريف
والشريف لأكبر غبي

Q80 Blogger said...

Selezya

احيج على الروح الإرهابيه .. لألأ .. اقصد الوطنيه
في التخلص من الجراثيم النايمه داخل المجلس

بس في حل أبسط
انج انتي وانا والي يسمعنا .. الكل يفكر مليون مره بعياله قبل لايفكر بنفسه

مانبي وايد .. لاتفكرون بالكويت .. كيفكم

بس الواحد يفكر بعياله بالمستقبل

هل النواب الي بالمجلس يستحقون انحط بيدهم ثقتنا ومستقبل عيالنا .. بالأحرى مستقبل الكويت !!

Q80 Blogger said...

فتى الجبل

من حقهم يحسدونا الصراحة
مجلس يهبل
مافيهم واحد يحط مصلحته على الرف لمده جلسة وحدة
بس وحدة

مايقدرون

سدرة العشـــاق said...

صح إلسانك

ألحين الحجي ملينا منه و نبي فعل ... كلامنا صح و منطقي بس و التالي ؟

نفجر فيهم على قولة سيليزيا ؟
ولا ننطر لي 2010 عشان ننتخب من يده و يديد ؟
نفس الأشكال إذا مو نفس الأسامي نفس التفكير يبيلنا غسيل مخ كلنا و نبي ناس تطبق القانون على نفسها قبل غيرها

أهم شي القانون ... لي طبقوه كل واحد بيحترم نفسه و ينثبر

بس الشكوى لله
:(

am sad

Q80 Blogger said...

سدرة العشـــاق

اشدعوه زعلانه
عادي ماتعودتي
انا صار عندي مناعه من هل سوالف
اتحلطم واسمع كلام يغث من كل مكان بالكويت
بس عادي .. سهلات .. هذي الكويت

واذا على الخطوه اليايه

انا اقول اقتراح سيليزيا حلو .. لكن صعب التطبيق
بس ننطر 2010
انا قررت مع اقرار الدوائر الخمس .. اني اصوت لاربع نواب يدد .. مادشوا المجلس من قبل
لكن مع الوقت اتضح انه هل شي صعب

لأنّ نوابنا نفسهم الي بالمجلس .. من الحين قرروا اي مناطق ينزلون وتأكدوا من كل تحالفاتهم
وشي صعب واحد يديد يوقف جدام كل هل جراثيم
إلا اذا كان واحد منهم واليهم

على العموم مثل ماقلتي
الشكوه لله

Eng_Q8 said...

هذا سيفوه وهذي خلاجينه

لابد من وقفه وارجوا قراءت موضوعي الجديد لاني تكلمت عن الوقفه وشكرا

على نفسها جنت براقش said...

انا قلت لكم نسوى اعتصام الجو حلو احسن من الصيف
على الاقل الوفيات بسبب العوامل الطبيعيه بتكون اقل
كل من يجمع الاهل و ماكو شغل او دوام الى ان تتنفذ شروطنا
بس لازم نكون وايد و ابـ جذى نأثر عليهم

وانا على صمون الفلافل و البطاط
من مطعم شرف
أو كنارى

حياتي هدف مو عبث said...

المشكله إنهم رجال وهم كالأطفال, أحياناً أشفق عليهم إن لم يكن دائماً .. كل واحد يدور مصلحته
ويمثل دور الخائف على الكويت وعلى الشعب وهو خبيث بمعنى كلمه
...

شي مخجل إن كان هم المجلس والشعب الزيادات وإسقاط القروض
ونعم المجلس والله

...

شكراً لك أخوي

Anonymous said...

كلام طيب ورأي صائب تشكر عليه أخي الكريم ...
ولكن وبكل أسف هذه مخرجات الدوائر الـ 25 فقد شهدنا حالة من الحشد والفزعة الانتخابية مع المرشحين ممن ينتمون لأحزاب اجتماعية او كتل سياسية فلنأمل أن تكون نتائج مجلسنا القادم أفضل لأنني أمانة غسلت ايدي من هالمجلس اللي أغلبية اللي فيه يبون ياكلون من الكيكة !!!

Cr8ivia said...

توني قاريه مقاله الفهد بالجريده
و ييت قريت عالبوست

والله العبره اخنقتني على هالحال

Q80 Blogger said...

Eng_Q8

كلنا نتمنى وقفه .. بس السالفه مو سهله يا خوي
وتمت القراءة :)


على نفسها جنت براقش

والله فكره .. الجو حلو وصمون مشكل
والله مستعد طول اليوم اعتصام
لا بس نبيه بمكان سنع
يعني مثلا مارينا مول صوب البحر

ولا اقول .. الخيران .. خوش مكان للمظاهرات والاعتصامات :)

Q80 Blogger said...

حياتي هدف مو عبث

خبيثين على روحهم .. نصهم مكشوفين .. وللأسف هم يوصلون مره واثنين وثلاثه .. لقاعات المجلس
شيء غريب الصراحه
الشكر موصول لج



Q8yUK

شكرا اخوي على الكلام
بس شوف .. بالنسبه لي غاسل نفسي حتى من المجلس القادم
اتمنى ان تكون مخرجات الخمس دوائر افضل
ولكن مما أراه الآن .. لا شيء سيتغير .. فهي نفس الوجوه ونفس التكتلات .. ونفس القبليه والطائفية
الحل الوحيد في الوقت الحالي هو نشر الوعي
الوعي اهو الي ناقصنا .. لو في وعي انتخابي .. جان معضم الاشكال الي بالمجلس في الوقت الحالي مو موجوده
شكرا

Q80 Blogger said...

Cr8ivia

ما ودي اكتب اشياء تضيق الخلق .. انا مو من النوع التحبيطي
لكن الديره خلتنا جذي
لي بغيت اكتب شي .. اشوف كل شي اسود جدامي
عاد قبل اشوي قاري نفس الموضوع الي تقولين عنه
النائب المشفطجي هههه
الاحباط موجود للأسف في الجميع
لكن بايدنا التغيير
بس للأسف مو عارفين اشلون نبتدي
شكرا

Unknown said...

الخمسين كانو بيسكتون الناس شوي

والصراحة الديرة صايرة بطيخ فى بطيخ بسبب هالتبعثر اللى ماله داعي

حسام بن ضرار said...

باقر راح ضحية لمواقفه المبدئية

و تدري العموم هني ما يحبون اللي يتمسك بمواقفه

ezain_kilah said...

يا خوي يا بلوجر مجلسنا الموقر-الله يخلينا له- ينكتب فيه مجلدات... ملحمة... ثنتين... ثلاث

صح بيدنا نغيره, بس بكل اسف وايد ناس مستعدة تبيع الديرة علشان مصالحها

note:
u do realize that u have a problem with ض n ظ, dont u?
n i'm more than willing 2 give u lessons free of charge ;p

Q80 Blogger said...

Mishari

مايفكرون .. تخلف والله
خلني ساكت بس
بطيخ وستين بطيخ بعد :)
الله يعين


حسام بن ضرار

شي غريب الصراحه ؟؟؟
نشوف المديح من كل مكان للتكتل الوطني لوقوفه ضد اسقاط القروض
ونشوف بالطرف الآخر الانتقاد لباقر
مو اثنينهم نفس الموقف؟
ليش يعني؟

مو جنه الوطني نصهم يملكون اسمهم في البنوك وخايفين على نسبهم تنزل

صار التركيز بس على باقر وسببه وقوفه مع المديونيات الصعبه
مو جنه التكتل الوطني من اشد المؤيدين لذلك القانون

شيء غريب ديرتنا

الله يجازي كل شخص على نيته

Q80 Blogger said...

ezain_kilah

وهم صح في ناس تركض ورا مصالحها
لكن المفروض احنا الاكثر
واحنا نوقفهم عند حدهم

بس اذا كانو اهما الاكثر .. هذا موضوع ثاني الصراحه .. يحتاجله نقاش طويييييل

اما بالنسبة لحصص العربي
فصراحه انا مستعد
من انا بالمتوسط والمدرس المصري يضغطنا
انتو يا الكوايته ماعندكوش فرأ بين الظاد والضاد

يعني جنه الي يقول كلامهم كلش الحين .. نص الاحرف بالعينها

وانا من قال الكويتيين .. وانا صارت هذي عقدتي
مادام انا كويتي
يعني لازم اغلط بين هل حرفين
شي بالعقل الباطن :)