Tuesday, October 30, 2007

علقوا قدمنا




تعليق عضوية الكويت في الاتحاد الدولي لكرة القدم (فيفا)ـ

شنو يعني تعليق ؟ .. ببساطه يعني ماكو مشاركات خارجيه بالمره !!

انا بفهم هذا الي يبونه؟ .. هذي نهاية رياضتنا

من كثر النزاعات الي بين هل شيخ وهذاك الشيخ

والتاجر هذا مع التاجر هذاك .. هذا الي وصلنا له

الشي الي مو راضي احد يفهمه بالكويت .. انه كل مجال وله جماعته

يعني واحد تاجر ورئيس نادي ووكيل وزارة ورئيس جمعيه و و و و .. ليش؟





هذا الي كنتو تبونه .. زعلانين عشان مجلس الامه قاعد يوقفكم عند حدكم

قلبتو الرياضة فوق تحت .. ولا راضين تهدونها

نبي محاسبه عسيره من المجلس .. مانبي السالفه تمر جنه ماصار شي

الي صار شي خطير

هذا هدم لكل الرياضة


وحسافه على رياضتنا بشكل عام .. وعلى منتخبنا الازرق بشكل خاص






بهل مباراة ضد البحرين ... انا طاق درب مع الشباب رايحين نشجعهم وللأسف خسرنا

الحين مو مشكله كيفهم خل يخسرون .. بس نبي ندش بطوله على الاقل .. البطولات انحرمنا منها



بإختصار .. شكــــــراّ طــــــلال

12 comments:

فتى الجبل said...

شكرا ومبروك لطلال هذا الانجاز

بنت الشامية said...

يا غردنا....... بيتفرغون لنا عدل

بعد...... لاشغل ولا مشغله

يا شماتة ابله ظاظا فينا

Selezya said...

@@ من صجكم
؟

اوخ قوية

!!

حسام بن ضرار said...

اعتقد اللي صار نتيجه طبيعية و نهاية حتمية لقرادة الكره الكويتية و تخبص الاتحاد


افتكينا

و بلا منتخب بلا كره

ما حافظوا على اسم الكويت في المحافل الدوليه للأسف

mtfa2el said...

دانت بتقلب مواااجع
المشكلة انهم مو مقتنعين انهم خربوا الرياضة بما فيه الكفاية
منتخبنا صار بالحضيض بمعنى الكلمة
ثلااااث سنين مو فايزين على منتخب خليجي ..و الرياضة اهي البداية شكلهم بيكملون المسيرة الربع
الله يستر

Q8i_Blogger said...

فتى الجبل
اي والله مبروك


بنت الشامية
ابله ظاظا بتتشمت بالديره كلها


Selezya
شفتي اشلون؟


حسام بن ضرار
مو خوفك اليوم كره .. باجر يد .. الي وراه سله
آخر شي حتى البراحات يعلقونها


mtfa2el
اي والله .. الله يستر
لا حتى الهند طاقتنا 3-2
خلها على الله

يعقووبوو said...

شكراً طلال (:

Mishari said...

الرياضة انعدمت

ومثل البنت البكر اللى اغتصبوها

شباب صغار وهالسنة كنا متفائلين خير بتغيير الدوري ووجود ناس زينين

واللى نشوفه سياسة تفسد كل شى

حلم جميل بوطن أفضل said...

نسيت تشكر سعود بعد
!

للأسف .. الحكومة ليلحين بمعاناة الشباب و تحسرهم على تدمير الرياضة في الكويت من أجل صاحب العيون الكحيلة
!!

Q8i_Blogger said...

يعقووبوو
تشكرات طلال :)


Mishari
مشكلة ديرتنا مثل ماقلت مافي شي اسمه تخصص
الكل يفهم بكل شي
يعني ناس ماتدري الكره مدوره ولا مربعه
داشين باهل الرياضه .. بس يلحقون الفلوس الشهره .. خلها على الله


حلم جميل بوطن أفضل
ليش اهو فرق بين الاثنين؟
مو نفسه سعود اهو طلال ؟؟؟؟
خلها على الله

rwatan said...

يا الله... هذا جزاءنا و هذول شيوخنا. ملزومين فيهم(: بزينهم و بشينهم. ولا يعني شنو الحل؟ ابي حل واقعي بعيد عن المثاليات و الكلام الإنشائي. شنو بيدنا نسوي.
أغلب الكويتيين كانوا جمهور متفرج ولا نزال جمهور متفرج
و الآن العالم علينا يتفرج وصرنا مسخره

حسافه والله

Q8i_Blogger said...

rwatan
مثل ماقال جعفر رجب
وراء كل مصيبه لا تبحث عن إمرأة .. بل ابحث عن بشت