Friday, October 05, 2007

قرقيعان متأخر



موضوعي اليوم هم منوّع فسميته قرقيعان :)
قرقيعان آخر الشهر



أولا : العشر الأواخر:ـ

احنا الحين في ايام نتحرى فيها ليلة القدر وهى ليلة خير من الف شهر، يجب علينا جميعا أن نغتنم هذه الفرصة في الإكثار من العمل الصالح كالصلاة والصدقة والذكر وقراءة القرآن وكثرة الإستغفار أيضا، ولا ننسى الأمر بالمعروف ونهي عن المنكر، وأيضا في نفس الوقت الإبتعاد عن كل ما يغضب رب العالمين.


ثانيا: رمضان واليدام :ـ

قلت في بوست سابق بأن الطبق الرئيسي يكون عادةّ المشخول وشيء يسانده

يختلف اليدام في هذا الشهر حسب المزاج

اذا كان ماكو وقت والمزاج مو شي


يكون اليدام شي سريع مثل الصوره القادمه :ـ



في الصورة مبين بيرجر مع خبصه يمه

هذي تعلمتها من صبي مزرعه واحد من الشباب

قالي اسرع شي تقدر تسويه :ـ
جم حبه همبورجر وبهارت وملح ... وفوقهم معجون طمام ... وخضره مثل بصل وبطاط الي مستخدمهم بالصوره وجذي تطلع وجبه قويه


*


*

أما اذا فيه مزاج ... الواحد وده يطبخ شي سنع
نشوف الصورة


هذي تعلوم الوالدة عاد ... قطع دجاج بالخضار

مالي خلق اكتب طريقة التحضير

اذا زاد الطلب عليها يمكن ابوح بأسرار الطبخة :)



ثالثا: يوتوب وسوالفه :ـ

عجبني هل مقطع :) مال السنعوسي










أخيرا :ـ

صاحبي الشاعر القدير بو جويس فيوزاته كلها ضاربه برمضان فعطاني اهداء ثاني

مــن حــبنـا لـهـا بــنـكـتــب لــهــا

جامعتنا العزيزه جامعتنا وانحبها

مـا نـحـضـر أبــد لـو مـــره بــعـد

نـسحب على المـحاضرة وأتباعها

مـا نــداوم أبـــد الــسـبـت والأحـــد

نقـضيـها ضـحك ولعب وغـشـمرا

شـنسـوي بـعد!! بـــنعـيـشـها هــدد

هـذي اهـي حـياتـنا بـره أرضـــهـا

وبـتـكــلم جــد ولا تـقـولـون لأحــد

العــيـشه بايخـه والله بـره أرضـها

كويتنا الحبيبه امنا ونحبها

17 comments:

Aldenya said...

بوستك حده مو وقته

الحين الساعة 4 وربع باجي ساعة وشوي على الأذان

وعصافير بطني إقلبوا معدتي الى حلبة مصارعة

والنتيجة إنهم تذابحوا

والسبب

صور الطباخ اللى حاطه :/

المفروض أدش بلوقك والمعده مفوله :>

وبوجويس حده بدع :>

يايبها رايت بالقافية


والله ينولك ويبلغك إنت وجويس وكل قرائك ليلة القدر

Q8i_Blogger said...

Aldenya

صحيح
المفروض اكتب تنبيه ... البوست يصلح فقط لبعد الفطور
خصوصا وانا اعلم انه طباخي لا يقاوم

واذا على بو جاسم
فهذا شي طبيعي انه يضبط القافيه
الواحد اذا كان صايم وبكلاس لازم يطلع ابداعات جذي

اجمعين على الدعاء الحلو

Mishari said...

اشوي انى توني متسحر وشبعااان وقاعد اشرب ماي واتفخ بطني فيه

:)

Q8i_Blogger said...

Mishari

بالعافيه يبه
زين تسوي .. خزّن قبل الدوام

ezain_kilah said...

al7een ur favourite books r ur studying 1'z?! imma hathy 3ayara or innik doodat kotob!

لول موفق بدراستك أخوي وبكل شي بحياتك :)

زين بما إنها اول زيارة لي لبلوقك وتوني داعيتلك, ممكن وصفة الوالدة السرية؟ :p

Q8i_Blogger said...

ezain_kilah

يعني لازم تذكريني .. قاعد اقص على روحي
ابي احبهم مو عارف اشلون !!

اما على الوصفه .. ممكن لكن بعد استشارت صاحب السر الخطير ... الوالدة :pP

loyalty said...

العشر الأواخر

" إن الخيول الأصيلة إذا شارفت خط النهاية تسبتسل .. فاستبسلوا "
مسج واصلني اليوم :)

نسأل الله القبول .

----

رمضان

للغربة فوائد كثيرة أطرفها إتقان المغترب للطبخ :)
بالعافيه .

----

أخيراً :

أعتقد إنه يحتاج يخوض حرب مع جامعته و دراسته و ينتصر فيها :)

تحياتي

mtfa2el said...

دير بالك بو جويس لا يصك على المتنبي
لووول
بعدين شسالفة اعلان الهجرة حق امريكا اللي يطلع من البلوق ؟
لك نسبة فيه ..نفعنا ياخوك خنحط عندنا بعد

Q8i_Blogger said...

loyalty

اجمعين القبول يا رب

ومثل ماتقولين لو بالكويت جان توست وجبن ما اسوي

واذا على الحرب ... اهو داش حرب الله يوفقه يا رب


mtfa2el

لووووول

اشدراني والله
كل يومين طالعلي اعلان شكل
هذا احسن واحد فيهم
انا بروحي ماعرف حق هل سوالف
جان زين يعطوني نسبه جان مايظل اعلان ما احطه :P

واذا على المتنبي ... تره اسمه المستعار المتنبي 2000
هههههههه

Selezya said...

عسا الله يبلغنا ليلة القدر انشالله ويقدرنا على ما بقى من الشهر وخاصة هالايام :)

---
طبخة البرجر بسميها شخبط شخابيط لانها حدها خبيصه احس لوول فقولي طعمها حلو ولا لا؟ لان الصورة ماتوحي انها حلوة :p

عاد الطبخه الثانية شكلها حلوه وماكتبت طريقتها !! شدعوه

عموما عوافي انشالله :)

صاحبك .. مؤلف كلمات ابداعية
عجيب :) له خلق والله بس يايب الكلمات عددل

الله يوفقكم :)
yala t c ;)

Q8i_Blogger said...

Selezya

آمين

بالنسبه حق الطبخه
الصوره ماتوحي لأني لما اسوي مايهمني الشكل
ادري شكلها مو شي ههههههه
بس جربي تسوينها واذا ما اطلعت حلوه انا اعتبر نفسي فاشل
البرجر هذا الناشف الي ناكله ... يصير ترف مثل الكفته .. خوش طريقه من صاحبنا الهندي

اما على صاحبي فاهو معذور
تره كل الي كاتبه كان في محاظرات في رمضان
يعني عادي
ادري مو مستوى المتنبي !!!
بس ندعيله انه يصير متنبينا اليديد :P

فريج سعود said...

وليييي انا داش الصبح بالغلط وشكلي خيلت على العيش المشخول
ما عندكم واحد يفتي لي بجواز الفطر عند زوغان القلب

Q8i_Blogger said...

فريج سعود

ههههههههههه

هاردلك يا الحبيب أدري مو خوش حركه على الصيام :)
تقبل الله

واذا على الفتوى تره زايدين هل جم يوم المفتيين الي من نوع ... إديني فرخه ... أديك فتوه
دورلك واحد

واذا كلش كلش ... جنه بجزر الهولولو اليوم عيد ... اشرايك معاهم؟

فتى الجبل said...

خوش قرقيعان

حمودي said...

عيدكم مبارك وعساكم من العايدين الفايزين

5roofa said...

لووول البوست عجيب بس الله يهديك الاكل ما يشهي كلش لووول

عيدك مبارك و عساك من العايدين و الفايزيين

:D

salamz friend...

Q8i_Blogger said...

فتى الجبل

اضبطك افا عليك بس



حمودي

أيامك سعيده وتقبل الله



5roofa

أيامج سعيده

بالنسبه حق الأكل
انا حاط هل صور حق الي من طقتي
هل طبخ يطلع شي عجيب بالنسبه لهم
اما الي بالكويت
فالله يهنيكم :)