Tuesday, October 16, 2007

منوّعات

اليوم موضوعي منوع وسريع قبل الإمتحانات




إستفتاء جريدة الجريدة



صج والله ؟ ... افا والله ماهقيتها
خيانه ليوم الخميس الصراحة!!

يوم الخميس ... يوم الشاليهات ... يوم الوناسه ... جذي التصويت يكون ... افا والله ... اشوه اني ليلحين ماشفت اليوم الي اداوم فيه يوم الخميس بالكويت
لكن أقول لجميع الي داومو يوم الخميس ... ذنب الأجيال في رقبتكم ... ضيعتو اعز يوم على قلوب الكويتيين
:)

انا سويت إستفتاء خاص ... خنشوف النتايج اهني

*

*


الكويت والكويت ... آخر شي بس 10 فنادق خمس نجوم بالديره

صراحه ... عروس الخليج صارت عيوز الخليج


الله يعين


*

*




مقالة جميلة من الدكتور أحمد الربعي .. أختلف معه كثيرا لكن تسعدني عودته للكتابة
والمقاله تستحق القراءه

*

*


مقطع من مسرحية سيف العرب غير معروض على أشرطة الفيديو


16 comments:

Q8DOLL said...

يالله صباح خير
:)
أحسك مقحص وانته حاط البوست

الخيانه العظمى مشكوك فيهامادري احس الاستفتاء فيه شي غلط
لانه كل اللي حوالي ما بطلوا تحلطم على يوم الخميس وأمجاده
تهقي ما مروا على اللي حولي ؟؟


عيووووز اي والله عيوووز حسافه عليج يا كويت




مقالة الربعي صح والله صح
انا اصلا القروض والفوائد ودي اكتب عنها وعن هذيل اللي يصفقون لها
قاعدين يضحكون على الناس
اصلا ماراح تصير ولو صارت ماحلوا المشكله الجذريه وهي ارتفاع الاسعار وارتفاع الفايده
فلوس الديره تضيع هني وهناك


ههههههههه سعابيل عرفات
تحولت الى زعتر


ليش أحس شعار الايد اللي حاطه جنه أحد يكم علي ؟؟
يتهيألي صح؟

Mishari said...

اول شى عيدك مبارك
ثاني
انا بالنسبة حق شغلى افضل الجمعة والسبت لان ما اشوف اهلى

فضبطت الحين معاى
:)
واحمد الربعي هرم كتابي حتى لو اختلفنا معاه

esTeKaNa said...

وااااي يا بعد قلبي يا الخميس
اصلا اشلون بنغني ليله خميس؟
واشلون بننطر الخميس
واشلون نتحلى على الخميس؟
:(
اهم شي انا لما يسئلوني اشلونج ويا دوام الخميس؟
وانا اخوي العزيز من تخرجت وقعدت بالبيت مادري شفرق الخميس عن السبت عن الاحد
الله يستر اذا داومت
:)

Ealaf said...

مارأيك بالقيام بحملة اعلامية كُبرى بعنوان

نبيها خميس !

.
.

والفنادق ,
أضنها تكفي , لعلنا نلحق على مشاكلها !!

.
.

وبخصوص المقالة , ماذا نقول وهل بقي لدينا كلام !
أليس في هذا البلد من يخاف ربه .!؟

magnoonah said...

انا شكلي العيد الياي يا اني ما راح اعطي عيادي
يا احول لك عيديتك على ام الدنيا
:)

شوف سالفة الخميس هذي قهر بروحها وكلمة حرام شويه فيهم

اما عيوز الخليج يحليلك والله مدلعها


اما احمد الربعي انا معاه ومعاه ومعاه
وبسولف واقولك وانت احكم
اليوم يت مره عوده وللاسف نا قدروا يسحبون منها دم
رحت اساعدهم وفعلا قدرت اسحب جم قرشه الا القرشه الاخيره الي هي من نوع يديد ويمدحونها
اضطريت ابدل اربع قرش والدم ما يطلع فجاه طلبت احد يعطيني قرشة للدم من النوع القديم الي تكون مصنوعه من زجاج مو بلاستيك وفعلا طلع معاي الدم وسحبت الابره من المره الكبيره الي هي مقعده على كرسي متحرك

دخلت على المسؤوله وقلت لها ليش النوع اليديد هذا وشلون هو فاشل وراح ياذي المرضى

ردت على مسؤولة التخزين تقول الوزاره صارت تييب نوعيات رخيصه من المواد من ابر وقرش دم والذي منه

انزين بدل فسفسة الفلوس على الفاضي قدروا هالناس المساكين وييبوا شي نستفيد منه وما نقطه بالزباله حراه هذول مرضى


ادري طولت اسفه اتمنى تسامحني بس شي يقهر لو تخيلت انه ابوي او امي الي يصير فيهم جذي


اسفه مره ثانيه

Q8i_Blogger said...

Q8DOLL

هههه
مبين كاتبه على السريع ادري ... بس ماكو وقت شنسوي !!

اما عن الخيانه ... فاتوقع في تزوير في صناديق الاقتراع
لازم نطالب باعاده الفرز

واما على القروض فصراحه ماعندهم سالفه من هل مطالبه

اما على الايد
فأطمنج .. تره يتراوالج
تره بالعكس .. الايد هذي تقول هلوووو :)



Mishari

ايامك سعيده
شكله عشان يا مشاري اقلبوها الاجازه وعفست الديره :)



esTeKaNa

لا تذكريني خلاص .. تره ابجي على يومي العزيز :)



Ealaf

والله فكره قويه ... نبيها خميس !!!!!
وهم نبيها خميس !!



magnoonah

والله الصراحه السالفه محزنه
ووايد من هل سوالف كل يوم نسمعها
وربعنا مجلس الامه مايبون لا يعدلون خدمات صحيه ولا يبون يرفعون اقتصاد
تفكيرهم بس اصوات
يقصون على الناس بالفلوس ... والناس يصوتونلهم
الحل بسيط والله
الكل يفكر بالكل .. مو الكل يفكر بروحه
وماله داعي الأسف ... تعليق ممتاز ويعطيج العافيه

Selezya said...

hii

لوول لحظة .. ترا انا ما صوتت للحين
يعني مالي شغل

بس تبي الصج
ماصوت لان مالقيت الاجابه اللي ابيها
لقيت بس نعم ولا
انا حبيت اقول ان مايهمني
لان للحين حاسه ان الخميس عطله
(a)<< angel face :p
يعطيك العافيه على منوعاتك الخفيفه
وبالتوفيج انشالله بالامتحانات :)

vancouver said...

ويييييييينك يا يوم الخميييييس
حتى الاربعاء ترى كان يوم مميز لانه مشبوك بالويك اند


بس ما اصدق

صج خياااااانة
ههههه



ومقطع سيف العرب
لوووووووووووووووووووووووووووووول

Q8i_Blogger said...

Selezya

يعافيج والتوفيق للجميع
اما عن الاجابه الي تبينها
انا ماحبيت احط اجابه بالنص
ماحب الاجابات الي بنص
يا ايه ويا لأ
ادري بتحطين ايه عشاني صح ؟

الي يقول الاستفتاء الي اهني راح يروح الامم المتحده :)



vancouver

اي والله على رايج
كانت زوارات الاهل وحده الاربعا والثانيه الخميس
الحين اكيد غيروهم
للأسف خبانة :)

Shather said...

مسرع ما تنكروا ليوم الخميس :|

... مع ان الكل اشوفه متضايق و متأزم ..


لاعب في النتايج يمكن :\

Aldenya said...

راح الخميس وراحت أيامه

مو حلوة عطلة السبت
مالها طعم :/

حتى الاربعا
اللى كان بداية العطلة الأسبوعية
راحت حلاته


مادري ليش او حكمة التغيير

والفنادق
ترى تفاجأت
معقولة !!

mtfa2el said...

انا معاك صج صايرة لخبطة بس همن لها ايجابيات عطلة السبت
و مقالة الربعي صراحة من النوع الزقرت

Q8i_Blogger said...

Shather

اكيد لاعبين بالنتايج ... في احد يقدر يصوت ضد يوم الخميس :)



Aldenya

اي والله حتى الاربعا راح علينا للأسف

واذا على الفنادق
توقع كلشي انتي بالكويت
ديره العجائب :)
وسلامي على السياحه



mtfa2el

انا اقول اذا يبون يسوونها صح خل يخربونها مره وحده
سبت واحد اجازتنا
والله تصير ازقرت
نص دوام اليمعه .. شغل عدل
وهم تعاطفا مع الي يدرسون بره :)

Keiewii ! said...

بالنسبه للإجازه الجمعه والسبت ، نحنا في دبي تعدونا عليها.
بس تبغون الصدق ... الخميس والجمعه احلى !

5roofa said...

وي وي وي وييييييييييي

ليش ليش عاد انا احب الخميييس
;/

مالت على الباميه لوول انزين يصير كل ما ادش اصوت ولا بس مره وحده
;p

bs 7aram tara el kuwait lel7enha cutaa
:D

lol

nice post

salamz friend...

Q8i_Blogger said...

Keiewii

اكيد احلى ... الخميس ماكو عليه
:)



5roofa

والله يمكن يسوولج واسطه تصوتين اكثر من مره .. خصوصا اذا كنتي تدرسين بنت واحد من المسؤولين عن الاستفتاء :)

الكويت كيوتا
لا تعليق