Tuesday, April 08, 2008

دواوين .. والصقر

تحديث

آخخخخخ لو بعض الناس تحت ايدي .. جان علمتهم شغل الله

قاعدين بغابه .. مو بديره قوانين
يطقووون القوات الخاصه ؟ .. مو اهي هوشه بمدرسه صح
!!
الميع يقول .. هذول العيال متيمعين عند بيتي !! .. هذول عيال !! الله يستر من الباجي عيل



*
*


موضوعي اليوم عبارة عن مقابلات قصيره مع بعض المتضررين من قانون إزالة الدواوين


أتوجه بسيارتي بإتجاه العاصمة .. وبالتحديد إلى منطقة كيفان العريقة .. حيث دوانية بو فهد اليومية

أنا : السلام عليكم

بو فهد : هلا والله بو جاسم .. حياك

أنا : شكراّ. هل لي بمناقشة أحد القضايا الحساسة معك يا أخ بو فهد

بو فهد : حبيبي انته .. اشفيك اتكلمني ابجدي .. قول الي عندك وخلصني

أنا : لا بس بصير رسمي اشوي .. خلني مصدق روحي يعني عندي مدونة وناس تدش تقرااا .. على العموم .. يقولون حايشكم انذار على هل الدوانيه العامره؟

بو فهد : اي والله .. قبل اسبوعين تقريباّ

أنا : واشرايك بالموضوع بو فهد؟

بو فهد : والله حالتنا حاله .. الي صج باط جبدي .. وين نروح الحين ؟؟؟ .. انا حياتي بهالدوانيه .. بيردونا على أيام حديقة كيفان مثلاّ ؟

أنا : واشفيها الحديقة ؟

بو فهد : يا عمي بالمتوسط انا !!! .. لا تذكرني بأيام الحديقة بين هالنمل الي يشقنا شق .. ولا اكو مطاعم اتوصل .. اللهم مضبطين المصري مال مطعم رش رش ساعات يوصلنا .. لا وكل يوم شكوى من البيوت الي حوالين الحديقه .. يقولون صراخ وازعاج !!

أنا : انزين وماكو غير الحديقة ألحين ؟

بو فهد : يعني بذمتك .. شوف ويهي .. انا ويه ستاربكس مرينا مثلاّ .. اهما هذا الي يبونه .. نقعد بهل مجمعات ونتطمش على الرايح والي راد !!

أنا : يا أخي مو لازم مجمعات .. روحو القهاوي !!

بو فهد : لا تسوي روحك غشيم .. مباراة مدريد ولا برشلونه يبيلك تروح من العصر عشان تحجز مكان زين بالقهوه .. ولا تبي نقولك اشصار بقهاوي شرق وغيرهم !! .. كل شي انشال !!

أنا : والله مادري شقولك الصراحه .. هاردلك

بو فهد : أهما بس لو ناطرين لي باجر .. ودي أشوف ارسنال وليفربول مع الشباب .. !!




إتجهت بعد ذلك لمنطقة بيان العظيمة .. منطقة صنع القرار في بلادنا العزيز .. وإلى دوانية أخرى جميلة بريئه محترمه ذات أخلاق عاليه .. لو هي بنت جان خطبتها

أنا : قوه يويسف

يوسف : يقويك يبه .. حياك حياك

أنا : الله يحييك .. هاااا يقولون كلها جم يوم وتطير هالدوانية الحلوه الجميلة البريئه

يوسف : إتصدق عاد .. باجر بنفضيها .. هاا شرااي !! .. عندي البلياردو هذي طايحه بجبدي .. مالها مكان داخل البيت

أنا : لا يبه .. وين أحطها .. والله عاد حرام فيها ذكريات !! إنزين أقولك .. إشرايك بالإزالات بشكل عام ؟

يوسف : شوف حبي .. السنه الي طافت قالو شيلو السور شلناه .. قالو شيلو الزرع والشير .. هم شلناهم
إحنا مع الحكومة .. مافي أحد ضد الحكومة .. وكلنا نبيها تطبق القرارات هذي

أنا : عيل اشفيك زعلان بعد جبدي ؟

يوسف : أنا أقولك ليش .. شوف .. طل بره الدوانيه شنوو تشووف
تشووف براحه مهجوووره .. هذي البراحه في مخطط الوزارة المفروض اتكون فرع جمعية .. لكن تم تغيير مكان الفرع لأسباب محد يعلمها وصارت براحه فاضيه بنص بيوت
أول ماسكنا .. كانت كرمك الله مكان تجمع جلاب .. كل جلب ضايع تلاقيه يفتر بهل براحه
بعدها بفتره .. لأ تطور الموضوع
صارت براحه مشهوره بالمواعيد الغرامية ( جلاب من نوع ثاني ) .. بحكم إحنا قراب من معهد تدريس لأحد الشركات الخاصه .. صارت البراحه مكان غرامي مو ناقص غير شموع او ورد

أنا : كل هذا بهالبراحه الدايخه !!

يوسف : اي والله هذا الي كان صاير .. بس بعد مابلشنا بهالدوانية وهم هل جم جار الي يمنا نفس الحاله .. خفت هل خرابيط .. بحكم انه المكان صار حي .. مو مهجور مثل قبل

أنا : يعني انتو ابطال الحين ؟

يوسف : لا ما قلنا جذي .. بس النقطه .. المكان مهجور ولا فيه أحد .. شنو أملاك الدولة هذي الي بايقينها احنا .. براحه كامله مهجووووره !!
يعني احنا لا ضارين أحد .. ولا أحد ضارنا

أنا : والله مادري شقولك يا الحبيب .. توك تقول مع قرارات الحكومة .. والحين مو عاجبك .. حيرتنا يا أخي !!

يوسف : حبيبي .. خل يدرسون كل حاله بحده .. يعني في ناس صج متعديه .. مثلا واحد بينه وبين دوانيته شارع .. ولا واحد باني الدوانيه حاجب الرؤيه ولا مأذي الجيران ولا غيره وغيره
لكن براحه فاضيه .. ومهجوره !!
شالهدف يشيلون دوانيه بهالمكان المهجور !!

أنا : الله أعلم !!!



الخلاصة:

في فئات وايد ماراح تتأثر بالموضوع هذا .. لكن لو ننظر لفئه الشباب !!
169 ديوانيه في اليوم الأول للإزاله .. على الأقل رواد كل دوانية ( فيها ) 15 شاب !!
هالعدد الكبير .. بعد ماكان يجتمع في الدواوين .. الحين وين تبونهم يروحون .. شقق بحولي مثلاّ !!

محد يقدر يغير قرار مثل هذا .. ولا نبيه يتغير .. لكن كان ودنا يكون تطبيقه بصوره أفضل وبعد دراسه أكثر
فالدواوين شي تمتاز فيه الكويت عن العالم كله
للأسف سنفتقد كثير منها في الأيام القادمه :)

*
*

واحد سماه شيخ الليبراليين !! مادري اذا هذا الوصف يعجب ربعنا الليبراليين ولا لأ

بس صراحه .. مادري اشلون الناس تدافع عنه

يعني أتركم مع الفيديو وانتو حكموا



يعني بغض النظر عن مقاطعات السعيدي .. وإختلافنا الشديد مع آرائه

بس أقوله يا الديناصور
( الظاهر حبيبنا وايد متعقد من فؤاده ووصفه لربعه بالديناصورات .. فصارو العالم كله بنظره ديناصورات !! ) ... وأقوله إتخسي بعد !!!!!!!!


هذا لسان شخص مثّل الأمه لسنوات وسنوات

تكفه يا ناس .. حكمو ضمايركم بتصويتاتكم القادمه .. انتو بصوتكم هذا تسلمون الشخص مستقبل عيالكم !!
مستقبل بلسان جذي .. الله يستر من هالمستقبل !!

*
*

اليوم البيرق لفرعون الشعر إن شاء الله

والحرب بعد بين الريدز والمدفعجيه .. وان شاء الله الأزرق ينطرهم بنصف النهائي
:)

46 comments:

فتى الجبل said...

القانون ما يزعل
وقبل كانت الدواوين داخل البيوت وكنا نتيمع فيها
ليش صار التعدي على القانون اهوا الصح
على فكرة ما عندي لا بيت ولا ياخور ولا شاليه ولا مزرعة ولا عند اهلي شي مخالف والحمد لله

Q80 Blogger said...

مايبيله يا فتى الجبل
ادري انت قانووووني :)


بس القصد اهني

في دواوين ماله داعي تنشال
بوجه نظري يعني

ومحد زعل
كلنا نطبق القانون :)

هو فقط رايي
وكان ودي تكون في نظره أكثر للموضوع

وحياك

فريج سعود said...

مع اني ماحبهم اثنينهم بس ابي ليفربول يفوزون علشان يوصلون النهائي معانا
تالي نشخطهم
اتوقع الليلة بتبجي بجي

كويــتي لايــعه كبــده said...

انت فوضوي
وكاسر للقوانين
ولا تحترم الدولة
وسبب التلوث البيئي بالكويت!ء

لوول

كيف تسأل هالاسئلة!؟
انت ما تدري ان الحكومه ابخص!ء
انت وامثالك (اللي اعزهم) سبب تراجع الدولة بمضايقتهم للجهات العليا المعصومة عن الخطأ!ء

يجب نبلع العافية ونزيل الثيل من امام البيوت ونخلي من يأجر القسائم الصناعية كعقار ويستفيد منه ومن يستقل النوادي الرياضيه بتعاقد بالباطن وووووووووووو

شكلي بكتب عن الموضوع هاليومين
حياك الله طبعا

باغي الشهادة said...

مدون جوال متنقل وبالعامي :-)

صراحة كلامك فيه كثير من الحكمة وإنه بالفعل توجد ديوانيات لا تضر أحد، وممكن كما ذكرت عدم استغلال البراحة يجيء بالأسوء، لكني أتم مع الإزالة الشاملة لأنه إن صارت الآن ورخصنا للبعض تلقاهم بالغد يبنون وأدوار وتعال فكك


وبالنسبة للنائب الصقر، والله ينقل لي الثقة أنه في رمضان 2005 أو 2004 أو بالكثير 2003 يقول وهو ذاهب لنادي الكويت فترة ماقبل الإفطار للعب الإسكواش، يجيهم الصقر وأسلوبه الغير مؤدب المعتاد ليأخد صالة وهو فاطر ومعاه مطارة القهوة... يؤكد إنه فاطر برمضان وشايفه وهو يشرف وليس مريض لأنه جاي يلعب اسكواش

إن شاءالله ليست غيبة لأنه شخصية عامة والتصويت له أمانة ويجب أن يعرف المصوت له إنه يصوت لشخص يفطر برمضان جهارا

صقر قريش said...

دام راعي الديوان متعدي على أملاك الدولة فيستاهل بصراحة والحكومة معاها حق لكنها تقدر تشيل دواوين الهوامير؟

اما عن الديناصور محمد الصقر اقول الشرهة مو عليك يابوجاسم الشرهة على اللي ينتخبك بصراحة هو والي يمه بصراحة هذيل المفروض مايمثلون مجلس ثانوية مو مجلس الأمة بعد.

يامدون :

ليش زعلان علينا بس لأن حنا مو من ربع كندا يعني:) لاتقاطعنا يامدون واقول لك شي بس ماتزعل يالحبيب ان شاء الله ابطال اوروبا مانشستراوي :)

Anonymous said...

محمدالصقر بذئ اللسان
وأى عوائل لها فضل على الكويت؟
الصقر ومحاولات ضم "الفرع"\الكويت للعراق في الثلاثينات؟

ولا الخرافي والعبث باموال الدولة وقوانينها لدرجة ان الخرافي صار له ولهم بشكل عام حصانه اكبر من رئيس الوزراء الصباحي واكبر من وليالعهد وباقي افراد الاسرة.

ذكرني بعد من العويل الى لها فضل على الكويت؟
الى دفع ربية للجمرك قبل النفط خذاها ملايين بعد النفط. وفضل الديرة عليهم وعلى الكل.

اعتقد الكويت بحاجة لعلاج نفسي للكل. الحضر يعتقدون بالاولولية والريادة. والبدو بالظلم. والشيعه بالاضطهاد. لكن الواقع ولا شي من الاوهام هذه حقيقة.

حسام بن ضرار said...

انا من شفت الوشيحي يقدم البرنامج تشائمت مو الموضوع

السعيدي ريال و زين سوا بالصقر

مسكين، متعقد من كثر ما الناس تسمي الليبراليين بالديناصورات، قام سما السعيدي ديناصور

محشوم يالسعيدي، و معلش لا تلوم الصقر... كل اناء بما فيه ينضح

ولد الديرة said...

ابدى من النهاية

الصقر غثيث

perioud

الدواوين

موضوع كبير و معاك حق في بعض النقاط

السالفة بدت من الشاليهات مرورا بالدواوين وانتهاءا باليواخير

كلها شهرين وتلقى الشباب فلونت بالفلبيني

We Love Guwait

صقر قريش said...

مدون م كثر ماعقدتني بىنا أنجلش سكول صوت مادري آنا انجلش سكول :)

Unknown said...

والله ما ادري شقولك الدواوين في ناس خالفت القانون وتستاهل يصير اللي يصير فيها
بس يا اخي قاعد افكر في ناس بدون الديوانية تموت

على العموم القانون الزم ان يطبق

اما حوار الصقر والسعيدي حسافة ما شفته كامل طافني بس فلللللللللله
وهذيل يبون يفوزون بالمجلس؟

vancouver said...

اللي بيستانسون من ازاله الدواوين احمه الحريم اللي رياييلهم 24ساعة منقعين فيها
ههههههه

بس معقوله ماكو حل الا بالدوانيه المخالفة
ليش مايقعدون داخل البيوت
؟

---

شفت الفيديو يمكن ثلث او اربع مرات
حسيت اطالع مصبنه يتهاوشون بالسكه عقب دوام المدرسه
شنو هالاسلوب
الطريفين العن من بعض
واحد يقول اتخسي ومستحقر البني ادم اللي جدامه
والثاني يتليقف ويبي يتهاوش بالايد -ماعنده مانع- شيء محزن والله
ضاق خلقي صج
:(

bo rashed said...

المفروض الدوانيات اللي مو متجاوزه يخلونها هذا رايي
والصقر احنا ندري فيه من زمان مو تكانه بس شنسوي بهالعالم اللي علبالهم ماكو احد زين غير ربعهم
اما السعيدي فانا يبيلي اعيش مع غوريلا لمدة سنه علشان احلل شخصيته
واخير
الكاس حق مانشستر بأذن الله
ماشفتهم شلون خلو فريق روما سلطه
وحياتي من غيرك يا فيرغسون سوتيه
p:

حد القلم said...

بيشيلون الدواوين عشان يعادلون بين الشباب الي يشغلون وقتهم بالدوانية و الشباب الي يعربدون بالشقق ..

يا جماعة مثل ما رخصتو حق الشاليهات رخصوا حق الدواوين ..

اما الصقر فهو من اسوا نواب الامة اداءا هذا كفو يترشح و يصير رئيس البرطمان العربي .. !
لا و فوق هذا بيتوسط لحل الازمة اللبنانية .. !

Najmah said...

خل يسوون دواوين في بيوتهم
وبعدين من متى يقولون لهم ان ممنوع
وماكو فايدة
احسن خل يشيلونهم
وبعدين كافي دواوين خل يقعدون يجابلون بيوتهم وعيالهم احسن
:)

someone_q8 said...

السلام عليكم
اخوي الحبيب , الخير يخص والشر يعم لو اتشوف بعض الناس اشلون ماخذ البراحة وامخليها مزرعة و ديوانية وامسكر الطريق على الناس شتقول عنه ؟
روح بطريق الفحيحيل السريع باتجاه الشاليهات وشوف المناطق اللي على يمينك ويسارك وشوف التعديات اشلون صايرة , بصراحة زين اتسوي فيهم الحكومة لان السالفة امصخت خل انحس ان فيه قانون يطبق ,
وبالنسبة للحوار الدايخ هذا فا لا تعليق عندي لكن اللي اقدر اقوله حسبيالله ونعم الوكيل على اللي خرب الديموقراطية علينا بسلوكياتهم الدايخه
لك مني كل تحية واحترام

بوتشخيص said...

انا الحين مو هامني من البوست لا الدواوين ولا الالصقر ..

أبي البراحة المهجورة وينها في؟

darkness said...

<<< تتشمت في الرياييل


ويه يا حرام بيشيلون الدوانيات

:(

مساكين


:P

vancouver said...

بلوغر

اش صار على فرعونك
؟؟
بشّر
ترى ما ادري اشصار

سبع والا ضبع
؟
هههه

Anonymous said...

ضاقت عليهم الدنيا الا على اراضي الدولة !!

يا سلام يعني اما ديوانية على اراضي الدولة او ماكو ديوانية

ياخي حط لك ديوانية داخل بيتكم حتى لو من ورق المهم ما تكون مخالفة

واذا البيت ضيج ماكو داعي للديوانية
ليش .. الواحد يموت اذا ما صارت عنده ديوانية
!!
منطق غريب واستفزازي !!

عفوا عزيزي كويتي بلوجر ترى ما اقصدك والله نهائيا بس اللي مضايقني التضخيم البايخ على مسألة تخالف القانون وما فيها لبس

تحياتي

Anonymous said...

your friend has a point!

I think they offer the tenant to buy the land...thats if the land was "mahjoorah" 3ala golat your friend :)


alsaqer wel se3eedi...al athneen at3as min ba3th...bthemetek hatha esloob seyaseen ymathloon albalad...law ow doctor ba3d :/

قلب طفله said...

و الله الدواوين المخالفه تستاهل

الازاله و القانون يمشي ع الكل

و بالنسبة للصقر و السعيدي

شي يفشللللللللللل هذول عينه من

مرشحينا و مستقبلا اعضاء مجلس الامه

الله المستعان

Q80 Blogger said...

فريج سعود

والله ولا انا اشتهيهم .. بس احس كان ودي ارسنال لأنهم اسهل على تشلسي من ليفربول :)
وانا ازيرق .. فليلحين ماكو بجي
يمكن لما نشيل الكاس تطيح دموع الفرح :)











كويــتي لايــعه كبــده

الله يعينك
انت صج لايعه جبدك

وانا اكثر منك

أقدر أأجر منك النك نيم هل جم يوووم ؟

:)











باغي الشهادة

اي انا المتنقل .. خوش وصف :)

صح كلامك
وانا هم مع الازاله
بس شي يحز بالخاطر عند البعض
يعني دواوين مو ضاره احد .. بالعكس فيها فايده الصراحه
على العموم
القرار صار وخلص
والله المستعين

وخوووش معلومه
ومو بعيده عنه الصراحه

حياك












صقر قريش

لا شالو شالو عن الهوامير وغيرهم

والصقر .. حتى ثنويه اتخب عليه

وصراحه دامك مانشستراوي .. فخلاص محنا مارينك :P

هههه
لا حياك اي وقت
وان شاء الله احنا نمرك بعد











Anonymous

اي والله وانت الصاج
الكل يبيله علاج الصراحه












حسام بن ضرار

هههه
اي والله
متعقد المسكين

الله يهديهم بس











ولد الديرة

أقوى شي البيريوود
هههههه

اهما الله يسلمك يبون الشباب بالشارع
خوش هدف
:)











صقر قريش

صبر
انت انجلش سكول ؟؟؟؟
مو لايق تره











Mishari

لا وفي ناس تدافع عنهم باستماااته غير طبيعيه

ومثل ماقلت
حلو تطبيق القانون
وجان زين تطبق كل القوانين بنفس الشكل

Q80 Blogger said...

آسف على الردود المتأخره
بس فاينلات وماكو وقت اسوي شي
اكمل الردود قريب ان شاء الله

Najmah said...

فانكوفر
لاااا مافاز :-(
اخواني لما الحين متأزمين
يالله خيره ان شاءالله

vancouver said...

كويتي
الله يوفقك بالفاينل
شد حيييييلك
وركز بالدراسه بس
خل عنك الانتخابات الحين
__

نجمه مشكوووره على المعلومه
زعلت :(
مو على الشاعر
!
على كويتي بلوغر
اكيد مغلّق الحين
:((((

Unknown said...

شرايك فيني ياصديقي وانا كاشخ وأعلق في مدونتك أول مره ؟

كنت دايما أقولك ان راح إيي يوم وأفتح مدونه من الحرّه..ويا هاليوم وللأسف لإتخذت الرار وباجر امتحان فاينل مصيري :)))

وصح لسانك عزيزي :)

Q80 Blogger said...

vancouver

لا مو كل الحريم
اول الوالده مستانسه .. دايم تقولي قعدو بالدوانيه كل يوم
احسن من طلعات البحر والبر ونقعد نحاتي
:)

والصراحه الدوانيه الي بره تكون معزوله اشوي واريح حق الشباب
اذا كانت داخل البيت يصير في وايد قيود
إلا طبعا اذا كانت معزوله وفي حدود البيت وهذا شي صعب في تقسيمات البيوت اليديده الي ماتزيد عن 400 متر

ولايضيق خلقج
هذا الي بالعلن
اشوه ماندري شنو الي يصير بعد ورا الكواليس
والشرهه علينا الي هذول يمثلونا











bo rashed

نشوف فيكم يوم يا مان يونايتد
وعلى ايد تشلسي ودي بعد











ابن زيدون

عشان يرتفع سعر البطل مره وحده
:)

والصقر مشكله صغيره مع السعيدي قلبها هوشه مدرسه واطلعلي بالهده .. وينه او وين سالفه لبنان











Najmah

يبيلج يوم تجربين تقعدين بدوانيه
واذا قدرتي تتحملين الازعاج الي يصير بالدوانيه ذيك الساعه يفكرون العالم يحطون في بيوتهم

طبعا ماننكر في وايد عندهم في بيوتهم .. بس بشكل معزول كليا عن البيت

وهذا الشي ماينطبق على بيوت الحكومه خصوصا القديمه ولا على القسايم ام 400 متر الي ماتكفي شي !!!

والدواوين مو لازم تضييع وقت
الدواوين كانت تجمع الكويتيين عندنا انكسر الدستور عام 86

الدواوين كانت تدار بها البلد منذ زمن بعيد

الدواوين تاريخ .. مو لعبه ولا مكان عادي


اشرايج فيني وانا أموت بالدواوين :P

Najmah said...

اييي والله بغاابة
يطقون الحكومة عشان تطبق القانون
والله مسخرة

Najmah said...

بلوووقر
وتقول الحريم مزعجييين؟
:P

Anonymous said...

يجب تفعيل هذه القوانين المخدرة

و يجب تطبيقها على الكبير قبل الصغير

و لكن لدي نقطة في قانون الإزالات الذي طال دواويين و حدائق الكثير من المنازل و بنفس الوقت بتجاهل متعمد نرى إن هناك الكثير ممن أقفل فمه عن تعديات الشاليهات على شريط الساحل الكويتي

فهل أصبحت شواطئ الكويت شركة مقفلة على شكرة المشروعات السياحية "الداثرة" و بعض شاليهات الكيربي الذين وصل بهم االتعدي إلى تسوير البحر من الداخل بوضع عوامات ؟


شاعر المليون ناصر الفراعنه سواء رضوا ولا إنرضوا.. و يبدو لي إنهم إنظلم كثيرا في النتيجة و لكن يبقى في النهاية إنه كسب قلوب و إعجاب محبيين الشعر

Aldenya said...

:>>>>>

اسمح لي يا بلوقر


انا ليلحين قاعده اضحك على الهيلاهوب

و
هنده


:>

Anonymous said...

التعدي على املاك الدوله هو من جعل هؤلاء يقفون بوجه الحكومة وهم يهال على حد قولهم


يعطيك العافيه اخوي وانا ضد التعدي وضد الاعتداء
ارجو منك قراءة مقال في الوطن للكاتبه فتوح صقر الغانم هو من سيوضح التعدي على القوانين في الكويت
المقال في الوطن بتاريخ 10 ابريل 2008 يوم الخميس

اخوك محمد البراك

Q80 Blogger said...

someone_q8

طبعا طبعا

بس نقطتي اهني
الدواوين الي تكمت عنهم مو ضارين احد
وبمنطقه مقطوعه عن العالم

اكيد اكثر المخالفات لازم تزال
في شغلات صج صج ماتتطوف يعني


وبالنسبه للحوار
مشكله الي يصارخ ليل ونهار باسم حريه الراي والديمقراطيه
آخر شي السانه جذي !!











الدائرة الثانية

مجهود طيب
يعطيكم العافيه











بوتشخيص

سؤالك صريح وقوي

رقمني وانا ادليك الموقع وكل شي تحتاجه لهل رحله الجميله











جارة القمر

شريره

ليش جذي عاد !!!

مالومج .. جزء من المجتمع النسائي الشرير المعادي











vancouver

لا تعليق

خل أفضى اشوي

والبوست اليايه عن الي صار بالتفصيل

:@

Q80 Blogger said...

مُحَسّدْ

أختلف معاك
لكن أحترم رايك

وصراحه .. في ناس تموت بدون دوانيه
انت شايف بيوت الحكومه اشلون قايله

تعال عندنا شوف صوب الدخل المحدود
بيت 350 متر
يادوب يكفي غرف حق اهل البيت

خلها على الله











Ghasheema

صح صح
أجار سنوي من الحكومه مثل الي يصير في الشاليهات
بس منو الي يفهم

وهل ناس الي بالفيديو احنا الي رزيناهم للأسف

حياج











قلب طفله

افا والله
الحين انا قلت قلب طفله
تبي تتعاطف معانه

بس طلع قلب قاااااسي مافيه رحمه

ولا بس على شغل الرياييل نشوفكم كلكم واقفين مع القانون
:P

Q80 Blogger said...

Najmah

مو مافاز

خسروووه يسمونها .. بالغش واللعب

بس انا راد لهل موضوع قريباّ











vancouver

اجمعين يا رب

بس هذول يخلونا انركز

يغشون عشان يطيحون الفراعنه

غير عيال عطى الي قالبين الديره

احنا وين والدراسه وين !!!!











Zgombey

وانا جم مره اقولك حرف القاف مشكله عندك
ياخي شوف حل لكيبوردك

وحياك بعد جبدي
نورت المدونه

صج اني موجود

بس زياده الخير .. خيرين

Q80 Blogger said...

Najmah

الحريم صح حدهم مزعجيين
والدليل
الكل فرحان بهل بوست

يتشمتون عشان الدواوين راحت !!!!











عتيج الصوف

ان شاء الله الحكومه تكون جاده
وتطبقه على الكل

اما بالنسبه لناصر

فصراحه اهما الي خسرو بأنهم خسروه
مو اهو الي خسرهم !!

ناصر مايحتاج لا بيرق ولا غيره











Aldenya

معذوووره

بس متأكده من السبيلنج مال الكلمه هذي !!

اكيد هنده !!

هههه

انا مو قادر اصيدها عدل











محمد البراك

الله يعافيك
وكلنا ضد التعديات والاعتدائات

ومشكور على النقل

حياك

صقر قريش said...

مدون ليش يعني موعاجبك!! لهدرجه شايفني متخلف:( أنا تقدمي والدليل إني حطيت مادري آنا أنجلش سكول :)بروح فيها من ربع الإنجلش سكول :)

Najmah said...

ليش مايصير أصوت؟
:\

Super Woman said...

السلام عليكم
اول شي انا مع الحكومه
الصراحع عاجبتني الحكومه هاليومين على سالفه الدواوين والتجمعات ومادري شنو
انا مو ذاك الزود بالسياسه بس لما اشوف حكومتنا ردت بقوه
وصارت تطبق قوااانين صح وتخلي اللي ما يعرف الصح تمشيه صح بالغصب
وبيني وبينك احسن شي سوته كل شي سوته طبقته بالسواااسيه
والحق ما ينزعل منه

ثاني شي انت كويتي وموااااطن كويتي لازم تصير مع حكومتك قلبا وقالبا واحنا لها سمعا وطاعه

انا ادري فيك انك خوش مواطن بس لا تتحلطم وايد

ثاني شي على سالفه التصويت انا اقول أتسبح !!

وشكرا :)

Selezya said...

انااا 100% معاك على الديوانياات
جيك على بوستي


وبالنسبه للتحديث .. صراحه الميع ماقال شي غلط .. قال مو قاعدين نسوي شي ومحترمين القانون بس عيب هالتجمهر جدام بيته من القوات الخاصه والله صح عيب

الريال مو مسوي شي ومو خوش حركه من القوات

حياتي هدف مو عبث said...

قعدت أفكررر واايد

أنا شقوول أسبح ولا أتسبح

:<

والـsms

ملييييييق بس يضحك ;p
تتوقع هالزهيوي له علاقة بالإنتخابات ؟

vancouver said...

اللميع يقول احنا مع القانون


طل
!

عفسوا الديره علينا
الله يعفسهم
:(

لولا الأمل said...

لووووووووووووووووووووووووووووووووووووووووووووووووول

ارد على شنو واخلي شنو هههههههههههههههههههههه

صراحة انا اول مره اشوف الفيديو ,, وانا مستغرب شلون وصل امر الفرعيات الى حد التطاول على القوات الخاااصة ,, حدهم بايعيينها صراحة , وللأسف شوهو صورة قبيلتهم وشوهو صورة المواطن الكويتي


اما بالنسبة للحوار فهذا عاااااااااام ثااني لوووووووووووووووووووووووووووووووووووووووووول

اهم شي مسوي مقابلة مع يوسف لووووووووووووووووول

صراحة حده نبي نهيت بالشوارع بعد ما شالو الدواوويين


اما سالفة الديناصووووووور فهذي مت عليييها من الضحك , المفروض الانسان المثقف قادر انه يصون لسانه عن السب


صراااااااااااااااااااااحة البوست مليييئ باللقطات المضحكة ,, حده عجيييب


وانا صوت مع ابي اتسبح ,, عناد في روميتي

ننطر يديدك يابو ناصر >> انت قلت سمني جذي عشان ناصر الفراعنة خخخخخخخخ

Anonymous said...

baroo7 asba7
o a3areef nas etgool broo7 at7ammam

J Daily said...

زين يسوون بالدواوين
وشكراً عاللقاء d-;
--
--
وهذه صيحة مقابله بالتلفزيون ولا السوق اليمعة؟
(: